El Día'l Traxe'l País aporta pa reivindicar la vistimienta tradicional

Va celebrase'l dia 16 en Grau.

La empresa de xestión cultural, comunicación y diseñu gráficu B. Alto, en collaboración cola Conceyalía de Festeyos del Conceyu de Grau y la Caxa Rural d’Asturies, entama pela primer vez el Día’l Traxe’l País na villa moscona’l domigu 16 d’ochobre. "Esta fiesta faise col fin de que toles persones que tengan un traxe tradicional asturianu puean vistilu pol gustu de facelo, reivindicando esti patrimoniu cultural munches veces escaecíu nes colecciones museográfiques asturianes que s’ocupen de los temes etnográficos y antropolóxicos", aseguren dende B.Alto.

"El traxe’l país o paxellu asturianu ta presente en casi toles manifestaciones festives d’Asturies acompañando a los grupos de baille tradicional, pero nun tenía un fiesta propia", recuerden, dalgo que se pretende camudar con esta cita que naz "como un momentu d’ociu y paséu, onde los participantes puean mercar nos puestos
d’un de los mercaos más antiguos d’Asturies y que más fuercia tien; amás de charrar, interpretar música y baille de manera espontánea o tomar daqué pel centru la villa". Dientro de les actividaes previstes, va facese na Plaza los Dolores, delantre la capiya del mesmu nome, el concursu Indumentaria.

Nesti certame, un xuráu formáu por Constantino Menéndez, Consuelu Riu, Fe Santoveña y Ana Villanueva, toos ellos espertos na materia, va escoyer los tres homes y muyeres meyor vistíos dientro de tolos participantes. Los primeros premios van llevar 200 euros; los segundos, 150 euros, y los terceros, 100 euros. En total, 900 euros que patrocina Caxa Rural d‘Asturies.

Pa participar, hai que ser mayor de 16 años y inscribise na páxina web del eventu rellenando un formulariu colos datos personales y mandando una semeya del traxe que se va vistir. Hai de plazu hasta’l día 8 d’ochobre.

Un datu importante pa tolos interesaos en concursar ye que la organización –según reza nes bases del certame–, acuta’l derechu a llimitar el númberu máximu de participantes por razones operatives. Llegáu esi casu, van tener preferencia los primeros n’inscribise.

Paxellos d'ente'l 1850 y el 1900

Los participantes nel concursu tienen que vistir un traxe compuestu por pieces y complementos confeccionaos en cualquier época pero que reproduzan de manera fiel (en corte, diseñu, adornos, xéneros, estampaos, etc.) les prendes qu’hasta la fecha se documentaron, de manera rigorosa y por medios diferentes, como propios del paxellu tradicional asturianu ente los años 1850 y 1900 en cualquier parte d’Asturies.

El xuráu va valorar les prendes de vistir y de calzar, les xoyes y los complementos (gafes, relós, etc.) de cada participante según l’estatus del traxe que se viste y la zona xeográfica que se representa. Los traxes puen ser de gala o de diario.

Tamién va tenenese en cuenta la idoneidá del texíu, el corte y la confección, amás de los colores y les combinaciones adecuaes de prendes y complementos. Igualmente, mentes que va penalizase la falta de xeitu nel vistir o la presencia d’elementos ayenos al traxe del país y a la época que se representa según les fontes documentales que se conocen hasta la fecha. Otru aspeeutu a tener en cuenta ye la presencia nel traxe de prendes auténtiques de la segunda metá del
sieglu XIX nos participantes que les vistan y así lo acreíten.

Indumentaria va facese en convocatoria única, a les once de la mañana. El sitiu onde tienen que presentase los participantes ye la Plaza los Dolores (detrás de la Casa Cultura) y, cuando arranque l’eventu, van desfilar per una pasera instalada na plaza de delantre la capiya.