El Día Internacional de la Muyer va visibilizase na cai y na rede

|
8-M Asturies Esenciales en Llanes

Esti llunes ye’l 8-M, Día Internacional de la Muyer, una fecha reivindicativa que, nesta ocasión, s’adapta a les circunstancies pola pandemia. Poro, nun va haber convocatoria de fuelga feminista –“la fuelga vive nes lluches”, afirma’l Movimientu Asturies 8M–, pero sí aiciones con aforu reducíu y presencia nes redes.

‘Esenciales’ ye la pallabra na que pon rescampla’l feminismu n’Asturies “porque la pandemia fixo más visible y manifiestu que nosotres, les muyeres somos esenciales y el nuesu trabayu y contribución ye esencial pa la vida. Tuviemos en primera llinia de batalla contra la COVID, fuimos la primer respuesta a la enfermedá dende les nueses profesiones feminizaes, y al empar precarizaes y mal pagaes”. Asina cifra que’l 70 por cientu del personal sanitariu del mundu, el 93 del personal de llimpieza, el 97 del emplegu nel llar, el 85 de cuidadores de dependientes y la mayoría del personal n’atención d’alimentación son muyeres, toes profesiones con alta esposición al coronavirus SARS-CoV-2, y, “sicasí, magar de ser nomaes esenciales, siguimos siendo les más probes, les peor pagaes y inclusive non remuneraes”.

Col focu tamién puestu na “fola de cuestionamientos, ataques y criminalizaciones hacia’l nuesu movimientu” Asturies 8M sal a la cai “a visibilizar éstes y otres reivindicaciones con responsabilidá y el control que’l contestu requieren”, siempre con midíes de seguranza y controles d’aforu. En total convóquense trece concentraciones pal llunes: pela mañana a les 12 hores na plaza la Casa Conceyu en Llanes, Cabrales, Ribeseya, Parres, Colunga, Ribedeva y Cangues d’Onís; y pela tarde a les 19 hores, tamién nel Ayuntamientu, en Llangréu y Cangas del Narcea, amás d’en Xixón (L’Humedal), Uviéu (cai Uría), Avilés (plaza Vaticanu) y La Pola Siero (cai alcalde Parrondo).

Amás, llamen a facer un aplausu dende les ventanes a les 20 hores en reconocimientu a les muyeres esenciales en primer llinia contra la COVID-19. Otra manera, mañana, día previu al 8-M, tamién va haber aiciones reivindicatives al meudía nes places de la Casa Conceyu de Xixón, Uviéu y Avilés.

Celebración dixital y otres convocatories

El Gobiernu d’Asturies, que nun celebra actu institucional, encamentó, dada la situación sanitaria, a reivindicar el 8-M de manera virtual. “Un 8M diferente, en plena pandemia. Un 8M nel que reivindicaremos el feminismu, esto ye, la igualdá real ente muyeres y homes, aprovechando les redes sociales, con actividaes y movilizaciones telemátiques. Un 8M dixital y telemáticu pa frenar a la estrema derecha”, afirmó’l presidente Adrián Barbón.

CC OO y UXT van facer la so habitual concentración pol 8-M, frente a la Delegación del Gobiernu estatal n’Asturies a les 11 hores. Mentes, nun momentu d’alderique nel movimientu feminista, con posiciones opuestes en dellos temes, el coleutivu antiabolicionista Rapiegas entama un actu a les 19 hores na Plaza Mayor de Xixón.

Na semeya, cartelos del Movimientu Asturies 8M en Llanes.

Contador Estadistiques