El Día de les Lletres Asturianes recupera’l Campoamor pal actu académicu

|
Teatru Campoamor nel XL Día de les Lletres Asturianes

Esti vienres celébrase’l XLII Día de les Lletres Asturianes. La pandemia obligó l’añu pasáu a treslladar la xornada a ochobre, que torna esti 2021 a les sos feches habituales y recupera’l Teatru Campoamor como sede del actu académicu, que se va poder siguir en direuto per TPA y RPA dende les 12 hores.

La Xunta Estraordinaria de l'Academia de la Llingua Asturiana (ALLA), que se tuvo que treslladar na edición pasada al Aula Magna de la Universidá d’Uviéu nun actu d’aforu mui reducíu, va acoyer al escritor Xandru Martino como académicu correspondiente y a la periodista Pilar Rubiera como acedémica d’honor. Un actu siempre mui emotivu que va contar cola asistencia del presidente del país, Adrián Barbón, ente otres munches autoridaes, y que se va poder siguir en direuto tanto pela televisión como pela radio pública asturiana.

La periodista Sonia Avellaneda va encargase de conducilu, mentes que l’entamu y el pieslle musical van tar al cargu del coru Cantos del Fontán, dirixíu por Rebeca Velasco. Enantes, Xosé Antón González Riaño, presidente de l’ALLA, va lleer el siempre esperáu discursu institucional.

Amás, nesta xornada va asoleyase’l númberu 37 de la revista ‘Lliteratura’. Ésta va tar dedicada a la traducción.

Día del Llibru Asturianu

La Direición Xeneral de Política Llingüística adelanta a esta xornada el concursu de microrrellatos asturianos improvisaos n’asturianu pa menores de 35 años ‘Entaína a escribir’, que nes cinco ediciones previes tenía llugar la selmana posterior. Amás cambia de sede, pasando d’Uviéu a LLABoral Centru d’Arte y Creación Industrial, en Xixón, con entamu previstu pa les 18.30 hores.

Tamién organiza’l tradicional Día del Llibru Asturianu en llibreríes del país, con un descuentu del 10 por cientu pola merca de títulos o discos n’asturianu o gallego-asturiano y la entrega de baldre d’ún de los llibros conmemorativos correspondiente según la zona. Participen esti añu ldaba Regalos, Aldebarán, Antares, El Búho Lector, Casa del Libro (tamién en gallego-asturiano), Cervantes (tamién en gallego-asturiano), Chemi, Diocesana, Elías, Esfera, Garluc, Maribel, La Palma, Polledo, Puntos, Reconquista, San Pablo, II Milenio y Trabe (tamién en gallego-asturiano), n’Uviéu; Acuarel, De Bolsillo, La Buena Letra, Central, 4 Letras, La Habitación Propia, Paradiso, Roy, Te Gusta Leer y Mundo Sonoro, en Xixón; Disco 55, La Llocura, La Pilarica y La Torre, en Mieres; Casa Pérez, Patefa y San Pedro, n’A Veiga; Fnac y Naredo, en Siero; Pablo, en Bual; Treito, en Cangas del Narcea; Alfonso, n’El Franco; Las Dos Vías, en Grau; Muséu de la Sidra, en Nava; Gestión, en Parres; Rima, en Piloña; y Sol, en Samartín del Rei Aurelio.

Concentración el sábadu

La Xunta pola Defensa de la Llingua Asturiana (XDLA) nun entama manifestación esti Día de les Lletres Asturianes pa reclamar la oficialidá del asturianu y el gallego-asturiano por cuenta de la pandemia y de la celebración del actu académicu n’horariu llaborable, proponiendo como alternativa una concentración mañana al meudía na plaza de la Catedral d’Uviéu. Los participantes van formar un mosaicu de banderes pa dar visibilidá a la reivindicación.

Na semeya, el Teatru Campoamor enantes del entamu del actu académicu del XL Día de les Lletres Asturianes, nel 2019. Güei l'aforu va ser controláu pa cumplir coles midíes de prevención de la COVID-19.

Contador Estadistiques