El Día de la Reciella algama la so V edición rescamplando'l papel del deporte

Yá ta abierta la inscripción pa la II Entaína, la carrera que reivindica la tresmisión xeneracional del asturianu

El próximu 1 d’ochobre Reciella, l’asociación de families pol asturianu, va facer otra vuelta’l so Día de la Reciella, nel que conciertos, gastronomía, ecoloxía, talleres, lliteratura, xuegos, comida, bébora y hasta pintacares son los ingredientes d’una xornada pa tola familia y toles edaes que yá ye una cita obligada nel entamu de la seronda.

Dende la organización confírmase que la programación d’esti añu yá ta zarrada “al 90%”, va anunciase nos próximos díes, y que va dir na llínia de les cuatro ediciones anteriores, pero “más y meyor, como correspuende al quintu aniversariu”.

Vuelve la Entaína

Esti añu vuelve la  'Entaína', la carrera familiar y popular pol asturianu que, depués del éxitu de la edición anterior, medra cola incorporación de 4 categoríes pa la xente más menudo nes que “va haber obsequios pa tola reciella que participe”.

Dende Reciella anímase a la xente a que se vaya apuntando yá nel formulariu que yá ta disponible y recuérdase que ye una carrera mui curtia de namás un kilómetru, pa tolos públicos, na que participen hasta families colos carros de neños y neñes y na que lo qu’importa y se celebra ye’l carácter festivu y lúdicu”.

Como l’añu pasáu, nesta II Entaína, habrá una familia representada por trés xeneraciones que dirá abriendo la carrera y apurriendo un testigu ente los miembros nos distintos tramos de la preba.

Amás, va repetise’l partíu de fútbol infantil organizáu pol U.C. Ceares y narráu n’asturianu, al que se va xuntar esti añu un partíu infantil de Rugbi, tamién narráu n’asturianu, cola collaboración del Gijón Rugby Club, que s’axunta asina al grupu d’entidaes collaboradores col Día de la Reciella.