El Día d'Andecha pon música

La Pola Siero ye'l llugar escoyío por Andecha Astur pa celebrar esti añu'l so día, y como davezu'l programa d'actividaes incluye delles actuaciones musicales.

Dende les doce de la mañana, esti sábadu 29 de mayu, la Pola Siero va andar animada col Día d'Andecha, gaiteros y gaiteres y pareyes de baille van pasiar pela Pola dende pela mañana. Xunta estes actuaciones de cai, a lo llargo'l día va haber tamién amueses de deportes tradicionales, un esposición de semeyes sobre'l Zapatismu, una xinta popular, y l'actu políticu central del día, un mitín de la coalición "Europa de los Pueblos" na que participa Andecha nes próximes eleiciones europees.

A les 21:00 la nueche llega'l conciertu, principal atracción musical del Día d'Andecha. Anguaño vamos tener tres grupos asturianos con estilos estremaos, dende los cantares tradicionales de Xosé Ambás, hasta'l rock y el ska Xune Elipe. Los primeros n'actuar van ser "Tuenda", grupín que ta formáu por Xosé Ambás, gaiteru y cantante de "N'Arba" que nesta formación aporta'l so inconfundible estilu de cantar, el bouzouki d'Elías García de "Llan de Cubel" y la xiblata de Pepín de Muñalén. Con estos músicos el grupu fai un recorríu pela tradición vocal asturiana dende occidente hasta oriente, con temes inéditos recoyíos pol propiu cantante Xosé Ambás.

Darréu de "Tuenda", va tocar un grupu de ska y rock que vien dende Lluanco y que de va poco p'acá empiecen a ser habituales pelos escenarios. Son "Skama la Rede", que va aprovechar esti conciertu pa presentar, y vender, la so primer maqueta en cd que vien col nome de "Hestories absurdes", na que vamos poder sentir cinco cantares de la banda. Pa pesllar la nueche "Dixebra", de los que poco más pue contáse d'estos auténticos referentes del rock n'asturianu. La entrada pa esti conciertu ye de baldre y va ser na pista polideportiva de la escuela Hermanos Arregui.