El día 26 va celebrase la VII Sestaferia Educativa

|

Esti miércoles fina'l plazu de matrícula.

La VII Sestaferia Educativa ta empobinada a maestros y maestres de Llingua Asturiana y Gallego-asturiano de Primaria, Secundaria y Bachilleratu, y consiste nuna xornada de 9 hores pa conocer toles novedaes que tán implantándose al rodiu d'estes materies en caúna de les estayes educatives de centros educativos d’Asturies. Asina, señálense como oxetivos d'esta iniciativa "potenciar el procesu d'enseñanza-aprendimientu de la llingua asturiana al traviés de les alfabetizaciones múltiples, proponer  esperiencies educatives d'ésitu nel ámbitu de la llingua asturiana y ufiertar un averamientu, al traviés de talleres, a los diferentes enfoques pedagóxicos de les alfabetizaciones múltiples dende la llingua asturiana".

La xornada va distribuyise en charres, presentación d'esperiencies y cuatro talleres simultáneos nos que van dir rotando tolos participantes. Los ponenetes previstos pal miércoles viniente son Miguel Calvillo (CEP Córdoba), Adela Fernández Campos y Irene González Mendizabal (Berritzegune de Getxo), José Luis Agüera Boves, María Ángeles García Rodríguez María Cuervo Escribano (IES Víctor García de la Concha), Ana Isabel Medina Zarabozo y Sidoro Villa Costales (CP Xentiquina), Montserrat Blanco (CP Rei Pelayo), Ricardo Saavedra (IES Carmen y Severo Ochoa), Chelo Veiga (Biblioteca Sara Álvarez Solís), Alba Hernández Boada (CP Santolaya), Ana Isabel González Álvarez (CP Benjamín Mateo), M. Mercedes Calzada (IES Batán), Xurde Fernández Fernández (IES Candás) y Nuria Sánchez Rodríguez (IES Padre Feijoo), amás de Milio'l del Nido, que va encargase de les conclusiones.

El Centru Profesoráu y de Recursos Cuenques Mineres y la Direición Xeneral de Planificación Llingüística y Normalización entamen esti eventu, de matrícula de baldre, nel Institutu Asturianu de Prevención de Riesgos Llaborales ente les 9 y 14.15 hores y de les 16 y les 19.30 hores. Güei ye'l día caberu pa formalizar la mesma, que se pue facer al traviés d'esta web.

AdxuntuTamañu
PDF icon Programa VII Sestaferia Educativa669.53 KB
Contador Estadistiques