El DesconFIGnamientu, alternativa pa esti añu en Villaviciosa al Festival Internacional de la Gaita

La crisis sanitaria frenó la organización de la decimoquinta edición del Festival Internacional de la Gaita (FIG), pero la Banda de Gaites Villaviciosa-El Gaitero nun quier dexar al conceyu ensin música. Entama asina nel Teatru Riera, con toles midíes de seguranza, el DesconFiGnamientu, que cuenta con actuaciones de N’Arba o Cerezal, concursu de gaita o certame de canción asturiana.

El xueves va comenzar esti festival alternativu cola actuación de la única formación de fuera d’Asturies, Alicornio. Los castellanos van presentar en Villaviciosa’l so primer discu, ‘Sol de los soles’, nel que reellaboren la música tradicional de la rexón vallisoletana.

Cerezal va trayer la so música al Riera’l vienres, mentes que’l sábadu’l turnu va ser pa N’Arba, conciertu que yá tien toles butaques escosaes. Toles actuaciones son a les 20 hores de baldre, y p’acutar plaza hai que ponese en contautu cola organización al traviés del corréu electrónicu desconfig.fest@gmail.com dando nome, apellíos y teléfonu indicando nel ‘asuntu’ qué banda se quier ver.

Tamién ye necesario siguir esti trámite pa les dos actividaes del domingu. A les 17 hores va desendolcase’l Certame de Canción Asturiana Xavi Solares, cola participación de Anabel Santiago, Carlos Velasco (dialogao), Alicia Villanueva (dialogao), Andrés Cueli y Rubén Barredo (xente mozo), con Valentín Fuente a la gaita. Darréu, a les 18 hores, va entamar el X Concursu de Gaiteros Memorial José Huerta, nel que van competir Eduardo Llosa, Paula Gutiérrez Montes, Laura González Castañón, María Gozález Fernández, María Fernández Rodríguez, Nuria Fernández Rodríguez, Pelayo Suárez Rodríguez, Olaya del Cueto, Christian Lanza y Sheila Noriega na estaya de mayores de 15 años; y Pablo del Cuadro, Sergio Cordero, Nel Cortizo y Celia Valle, na de menores de 15.

Un taller y una charra

Completa la programación del DesconFIGnamientu Festival un taller y una charra que van tener llugar nel Centru Cultural San Xuan de Capistrano. El primeru, de ‘Problemes y axustes na gaita asturiana’, a cargu de Pelayo Fernández, va desendolcase’l vienres a les 17 hores.

El sábadu a la mesma hora, mentes, el propiu Pelayo Fernández va participar nuna conferencia xunto Alfonso Fernández ‘Fonsu Les Regueres’ y Sergio Linde de nome ‘El proyeutu d’una gaita antigua: la copia del orixinal’. Pa participar nestes dos actividaes ye necesario tamién acutar plaza, nesti casu nel númberu de teléfonu 616.115.259.