El descensu del paru frena n’agostu depués de seis meses de baxada

|
Paru sector servicios

N’agostu frayóse la tendencia descendente del paru entamada en febreru al aumentar la demanda d’emplegu n'Asturies en 518 persones, una medra del 0,88 por cientu, inferior a la media estatal rexistrada esti mes, que quedó nun 1,40 por cientu. Sicasí, la cantidá total de paraos nel país, 59.224, ye la cifra más baxa en 14 años, dende’l 2008.

El crecimientu del desemplegu nel sector servicios marcó la tendencia d’esti mes n’Asturies, con un incrementu del 1,39 por cientu. Por contra, sigue la bona evolución na industria hasta’l puntu de caltenese en mínimos históricos de desocupación con 4.287 paraos.

Nel Estáu hai agora 2.924.240 demandantes d’emplegu al medrar esti mes en 40.428. Namái baxó’l paru en Navarra (1,52 por cientu), Aragón (0,74), La Rioja (0,62) y Canarias (0,60), rexistrándose los mayores aumentos en Melilla (5,95), Catalunya (2,80) y Murcia (2,40).

En términos interañales Asturies acumula 17 meses de descensu. En comparanza con agostu del 2021 cuenta con 2.445 paraos menos, lo que supón un descensu del 3,96 por cientu, ún de los más baxos del Estáu, que tien una media del 12,29 por cientu al rexistra una mengua de 409.675 paraos.

Lideren esti aspeutu Illes Balears (26,42 por cientu), Comunidad de Madrid (25,21 por cientu) y Castilla y Lleón (20,09 por cientu). Por contra, aumenta en Melilla (4,24 por cientu).

Una de les trés autonomíes onde xube l’afiliación a la Seguridá Social

Asturies contabilizó n’agostu 378.877 afiliaos a la Seguridá Social, el meyor datu pa esti mes dende’l 2011. Con respeuto a xunetu hay 231 cotizantes más (0,06 por cientu), convirtiéndose nuna de les trés autonomíes, xunto a Cantabria y Canarias, que ve crecer l’afiliación.

En cuanto a la contratación, baxó un 19,62 por cientu. Rexistráronse un total 23.111 contratos, de los que 7.036 son indefiníos.

AdxuntuTamañu
PDF icon Datos del paru agostu 20221.1 MB
Contador Estadistiques