El 'Derrame Rock' marcha d'Asturies por falta d'apoyu del Principáu

|

'Derrame Rock' va treslladase esti añu a Ourense, tres siete ediciones siguíes en Pravia. Asina lo anunció esti miércoles el promotor del festival, Enrique Granda, qu'aseguró que nes últimes convocatories la organización taba "na llende".

Amás, reprochó a la conseyera de Cultura, Mercedes Álvarez, que nun lu recibiera hai dos meses, cuando Granda acudió a pidir apoyu pa caltener el festival n'Asturies.
  
Enrique Granda esplicó en rueda prensa que pidió una cita cola conseyera de Cultura, que nomara'l branu pasáu al festival "como un eventu que contribúi significativamente a aumentar l'atractivu d'Asturies". Pal promotor del festival, el fechu de que nun-y concedieren la reunión ye "motivu bastante pa marchar". "Nun marchamos por dineru", calcó Granda, dao que lo que pidíen -según esplicó- yeren "apoyos", como Protección Civil o unidaes de la Cruz Colorada.
  
Nesti sen, Granda aseguró qu'anque 'Derrame Rock' siempre tuvo l'apoyu de Pravia, "nun se-y pue pidir muncho porque ye un conceyu pequeñu". Por ello, manifestó'l so deséu de que'l festival vuelva al conceyu asturianu. "El fechu de marchar d'Asturies ye pa que te valoren porque naide ye profeta na so tierra", afirma'l promotor de 'Derrame Rock'.
  
Pela so parte, l'alcalde de Pravia, Antonio de Luis Solar, resaltó la época de "recortes" n'Asturies por cuenta de la crisis, "sobremanera en cultura". Por ello, el rexidor espera que la marcha seya "d'ida y vuelta" y que valga "pa reflexonar n'Asturies".

Otru ‘Derramidea’
Antonio de Luis Solar, declaró que'l Derrame Rock, al qu'asistieron l'añu pasáu 13.000 persones, siempres foi "rentable pa Pravia". L'alcalde espera algamar eses mesmes cifres nel nuevu festival de música de Pravia, 'Derramidea', que se va celebrar los díes 1, 2 y 3 de setiembre d'esti añu.
  
Mientres la presentación de 'Derramidea', De Luis Solar esplicó que nesti nuevu eventu, que naz "con vocación de continuidá", va haber más variedá y "distintos tipos de música, abierta pa tou tipu de públicu". Trátase d'un formatu "más ampliu con más posibilidaes", dixo.
  
Coles mesmes, Enrique Granda apuntó que 'Derramidea' nun va ser un eventu "satélite esculpa" y añadió que "nun tien relación directa" con 'Derrame Rock', dao que'l nuevu festival va contar amás con actividaes culturales, como teatru y esposiciones.
 
Xustificación de Cultura
El viceconseyeru de Promoción Cultural y Política Llingüística d'Asturies, Jorge Fernández León, afirmó esti miércoles que'l Gobiernu d'Asturies vino ayudando "en tolo posible" al desarrollu del 'Derrame Rock' nes sos distintes ediciones, "incluyendo la so catalogación como Fiesta d'Interés Rexonal y importantes aportaciones económiques añales".
  
En declaraciones a Europa Press, Fernández León reprochó a la organización de 'Derrame Rock' que "el so pidimientu constante yera'l de más dineru", en contra de lo qu'afirmó güei en rueda prensa'l promotor del festival, Enrique Granda, qu'aseguró que más qu'ayuda económica, pidíen "apoyu" de tipu asistencial y loxísticu.
  
Nesti sen, el viceconseyeru calificó les afirmaciones d'Enrique Granda como "absolutamente inciertes y del too llamentables". Coles mesmes, recordó que nel presupuestu del 2011 "de forma específica figura prevista una partida destinada al mesmu de 25.000 euros pa la celebración del Concursu de maquetes, vinculáu a la organización".

 

Comentarios

Como siempre, la conseyeria de incultura apoyando duramente. Ya se vien viendo dende fai tiempu el desinteres del principau por tóo lo que nun seya hormigón, como la negativa a apoyar la representacion de asturies en Lorient y tal. Lo del Derrame ye otra piedrina más enrriba'l, teyau. 

Podeis vendeme munches coses, pero non que'l Derrame Rock ye una grandísima pérdida cultural. Si polo menos ficieren como la Selmana de Pachu, que ponen unos puestos de llibros de saldu ente hamburguesería y churrasquería... jajajajajajajajaja !!!!!

Gabis

Lo del tema del festival de Lorient sí que ye sangrante, pero lo del "Derrame Rock" a mí personalmente paezme que nun aporta nada a Asturies, culturalmente digo, y non precisamente pola música que se pueda sentir ellí. Pero bueno, ye la mio opinión namás, nun quiero polemizar.

Contador Estadistiques