El derechu a la participación nel urbanismu protagoniza un alcuentru ciudadanu

Entámenlu Podemos y Somos Oviedo.

El ‘Encuentro ciudadano sobre el Derecho a la Participación en el Urbanismo: diseñando el entorno en que vivimos’ va celebrase ente les 9.30 y les 19 hores de mañana nel Auditoriu d'Uviéu con un oxetivu doble: "reivindicar el papel esencial del Urbanismu como instrumentu pa meyorar les nueses condiciones de vida y, per otru, ampliar les llendes actuales del derechu a participar de forma activa na ellaboración de los planes urbanísticos". Asina, van axuntase formación y trabayu nuna xornada abierta a la ciudadanía cola intención d'ellaborar una propuesta de llei pal reconocimientu del derechu de la xente a tomar parte nel diseñu del entornu nel que vive.

Na sesión de la mañana presentaránse trés exemplos de bones práutiques de la involucración de la sociedá nos procesos de redaición de planes de rexeneración urbana a nivel de conceyu y de barrios. A les 10.15 horas va tener llugar la ponencia ‘Intervención integral del barrio Congost de Granollers (Barcelona)’, a cargu d'Albert Camps, cuartu teniente d'alcalde y conceyal d'Obres i Projectes i de Medi Ambient, Activitats i Espais Verds del Ajuntament de Granollers.

La conferencia ‘Planeamiento participativo y comunidades locales: la experiencia del Reino Unido’, a cargu de Manuel Carrero de Roa, doctor arquiteutu responsable de la subárea Infraestructures y Ciudaes Sostenibles del Conseyu Ciudadanu de Podemos Asturies, y miembro fundador de la iniciativa d'urbanismu participativu ‘Imagina un bulevar’, va comenzar a les 11 hores. Mentes, a les 12.15 horas va dar aniciu la charra ‘IdeAsPontes, un proceso de participación para el Plan General de Ordenación Municipal de As Pontes de García Rodríguez (A Coruña)’, a cargu de María Ríos, coordinadora de procesos participativos de participación pública asociaos a los planes xenerales, como IdeAsPontes.

Esta primer parte del alcuentru ciudadanu va zarrase a les 13 hores con un alderique colos ponentes de les trés esperiencies que va ser dinamizáu por Ignacio Fernández del Páramo, conceyal d'Urbanismu y Medioambiente.

La situación asturiana

Pela tarde l'actividá va centrase na situación asturiana. A les 16 hores David Alonso, conceyal de Xixón Sí Puede, va poner la charra 'Participación ciudadana en Asturias: la revisión del PGO de Gijón', pa siguir con un taller collaborativu a cargu de Carrero de Roa sobre conteníos básicos del derechu a la participación na ordenación espacial n'Asturies.

L'alcuentru finalizará coles conclusiones, a partir de les 18.30 hores, con Fernández del Páramo y el diputáu de Podemos Asturies y presidente de la Comisión d'Infraestructures, Ordenación del Territoriu y Urbanismu na Xunta Xeneral Héctor Piernavieja.