El CUPA va zarrar la matrícula del so cursu d’asturianu’l 28 de febreru

El ‘I Cursu Básicu d’Asturianu’ del Conceyu Universitariu pol Asturianu (CUPA), que va principiar el 2 de marzo, ta teniendo una bona rempuesta y yá cuenta con más de quince inscritos. El plazu pa facer la matrícula termina’l 28 de febreru.
 
El Conseyu de la Mocedá de Xixón, na avenía Manuel Llaneza, ye’l llugar onde va impartise esti cursu de 35 hores de duración organizáu pol CUPA en collaboración cola Academia de la Llingua Asturiana (ALLA) y Caxa Rural. L’horariu de les clases va ser de 19 a 21 hores, los llunes y miércoles. El preciu de la inscripción ye de 30 euros y inclúi tolos materiales necesarios pa dar clase, ente los que s’atopa’l manual ‘Xeitu’, asoleyáu pola ALLA, que va servir como guía del cursu. Les inscripciones pueden facese nel corréu lletrónicu conceyuasturianu@gmail.com o nel teléfonu 615.982.816 hasta’l llunes, 28 de febreru.
 
El CUPA muestráse satisfechu pola bona rempuesta nesta primer edición del cursu, puesto que, a falta d’una selmana pa zarrar la matrícula, el númberu d’alumnos inscritos yá supera la quincena. Dende’l coleutivu animen a los asturianos a “participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con unes clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura asturianes”.