El CUPA reclama a Gotor qu’apoye a los docentes d’asturianu y qu’esixa la reconocencia de la especialidá

El Conceyu Universitariu pol Asturianu (CUPA) cree que’l rector, Vicente Gotor, ha d’amosar una postura nidia énte la entrada de la LOMCE. Reclama-y un apoyu a los docentes d’asturianu y qu’esixa la reconocencia de la especialidá.

L’asociación presidida por Borja González Cantora sofita, nun comunicáu, les demandes de los maestros de Llingua Asturiana y Gallego-asturiano, y considera que ye necesario que la Universidá d’Uviéu tamién “muestre'l so apoyu decidíu a esti coleutivu y defenda’l futuru profesional de los docentes que forma, si tenemos en cuenta el perxuiciu llaboral que supondría la desapaición del asturianu de la enseñanza, fechu qu'afeutaría a unos 230 docentes que, amás, atópense nuna situación de precariedá o interinidá”. Pal CUPA, l’asturianu “ha ser una asignatura pa tolos alumnos, una asignatura normal, non una optativa, nin voluntaria, non enfrentada a otres materies”, y apuesta pol usu del idioma como llingua vehicular d’otres asignatures, “buscando un modelu afayadizu p'Asturies que permita que l'asturianu seya llingua d'usu habitual nes aules, amás de poder ufiertase como oxetu d’estudiu particular ya individualizáu na universidá mediante les preceptives ferramientes académiques”. Nesi sen, recuerden la importancia de “la reconocencia de la especialidá del profesoráu d'asturianu, agora que los estudios tán homologaos dafechu nel marcu européu”.

Al traviés d’una carta, el coleutivu universitariu demandó a Gotor “un posicionamientu claru de la Universidá  d'Uviéu”, faciendo mención al Alcuerdu Programáticu pa la Política Llingüística (2012-2016) robláu pol rector na campaña última, “nel que se comprometía a facer llegar al Gobiernu d'España la reclamación de la reconocencia de la especialidá”. Por último, insta al Executivu asturianu a que “s’esmoleza en facer suyes les demandes” de los maestros d’asturianu, “ya qu’entendemos que munchos mecanismos pa tratar de da-y igua a esti conflictu, defender la aplicación de la Llei d’Usu y Promoción del asturianu, y avanzar hacia'l so reconocimientu como llingua oficial, pueden dase dende Asturies”.