El CUPA entregó los diplomes a los alumnos que completaron el so segundu cursu d’asturianu

Esti xueves tuvo llugar nel salón d’actos del Conseyu de la Mocedá de Xixón la entrega de diplomes a los alumnos y alumnes que completaron los dos cursos d’asturianu entamaos pol CUPA. Nellos participaron 30 persones.

Inaciu Galán y González, presidente del Conceyu Universitariu pol Asturianu (CUPA), y Pablo Xuan Manzano, en representación de l’Academia de la Llingua Asturiana (ALLA), presidieron l’actu d’entrega de los diplomes a les persones que completaron les 35 hores llectives que conformaron la segunda edición d'estos cursos, de dos niveles distintos, que tamién contó con delles charres protagonizaes por espertos, como l’antropólogu Roberto González-Quevedo o la coordinadora de la Oficina de la Llingua de Xixón, María Xosé Rodríguez. “El CUPA valora mui positivamente esta esperiencia formativa qu’entamó en collaboración cola Academia de la Llingua Asturiana y la financiación de Caxa Rural y que tuvo una perbona acoyida ente universitarios y ciudadanos de dellos conceyos d’Asturies”, esplica la organización.

Ente los alumnos y alumnes, procedentes de conceyos como Piloña, Uviéu, Valdés o Xixón, hubo dende estudiantes universitarios hasta profesionales de dellos campos, como’l periodismu, la banca, la enseñanza y la psicoloxía; ames de casa; xubilaos; y l'edil socialista José Ramón Tuero, ex conceyal de Deportes, “lo qu’amuesa que del interés pol idioma d’Asturies participen persones de tolos sectores sociales y profesionales”.Como anéudota, hubo hasta representación internacional, yá qu’un estudiante brasileñu animóse a facer el cursu de nivel II a distancia.

Na so intervención na entrega de diplomes, Galán declaró nun poder tar más satisfechu pol enfotu puestu polos alumnos y alumnes del cursu, qu’inclusive animáronse en bona parte a presentase a la prueba de conocencia de l’ALLA que va tener llugar mañana n’Uviéu. “Toi seguru que los resultaos van ser mui positivos. Salís d’esti cursu con un bon nivel en tolos casos, anque habrá que siguir trabayando pola recuperación del vuesu idioma cada día”, señaló, pa depués facer referencia a la importancia que tien l’usu de la llingua asturiana nel día a día p’avanzar hacia la so normalización social.