El CUPA allarga hasta'l domingu'l plazu pa matriculase pal cursu d'asturianu de nivel I de Xixón

Esti domingu va terminar el plazu pa inscribise a la segunda edición de los Cursos Básicos d'Asturianu tres la decisión del CUPA d'amplialu pa ocupar asina toles places llibres. El de nivel II mantiénse abiertu hasta'l 30 d'ochobre.

L’Academia de la Llingua Asturiana (ALLA) y Caxa Rural collaboren col Conceyu Universitariu pol Asturianu (CUPA) na organización d’estos cursos que s'imparten nel Conseyu de la Mocedá de Xixón, asitiáu na avenía Manuel Llaneza númberu 68. Éstos tán dirixíos a tolos miembros de la comunidá universitaria y ciudadanos en xeneral que quieran averase a la llingua asturiana según el nivel de conocimientu que tengan de la llingua del país. Asina, el CUPA ufre la posibilidá d’escoyer ente’l nivel 1, destináu a aquelles persones ensin conocimientos d’asturianu o con un nivel baxu, y el 2, empobináu a les persones que participaren na primer edición de los cursos o que tengan un nivel mediu d’asturianu y quieran afondar nel conocimientu del idioma.

Les clases de nivel I, que van principiar el día 17, celébrense los llunes y miércoles, de 19 a 21 hores, mentes que los de nivel II van tener llugar los martes y xueves nesi mesmu horariu. Dambos cursos van tener una duración de 35 hores llectives. Los interesaos en participar en cualquiera de los cursos han de ponese en contautu col CUPA al traviés del corréu electrónicu conceyuasturianu@gmail.com o nel teléfonu 615.982.816, y pagar 30 euros. Tolos alumnos van recibir los materiales necesarios pa siguir les clases, como’l manual ‘Xeitu’ asoleyáu pola ALLA.

Dende’l CUPA animen a tolos asturianos “a participar nestos cursos que van sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies”.