El CSA La Xusticia de La Felguera echa a andar

Esti miércoles con una charra de Carlos Taibo.

El Centru Social Autoxestionáu La Xusticia, con sede na cai Valentín Ochoa númberu 5 de La Felguera, yá ye una realidá. Tres meses de trabayu, esta tarde va vivir la so inauguración col oxetivu de convertise nun puntu d'alcuentru pa los ciudadanos "que quieren apostar por un mou de vida más xustu y solidariu, menos consumista y individualista".

La primer actividá va desendolcase a les 19 hores d'esta tarde y va consistir na charra '¿Por qué las ideas libertarias son más actuales que nunca?', a cargu de Taibo, escritor y profesor titular de Ciencia Política y de l'Alministración na Universidad Autónoma de Madrid. Yá de sábadu, van siguir les actividaes, en concretu un conciertu n'acústicu del grupu Buenaventura y de la cantautora May, a partir de les 19 hores, a lo que van siguir una timba poétika con Pablo X. Suárez, Charo H. Checa, Javier G. Cellino y Erasmo G. Morán, la ellaboración d'un mural y un pinchéu.

Otra manera, ta programada una presentación pal sábadu 30, tamién a les 19 hores, en concreto del llibru 'Caerán bajo la espada. Higinio Carrocera. La lucha de un anarquista', del periodista uviedín Fernando Romero.