El cribáu de Salú pasa a dirixise a los ciudadanos de 12 a 35 años

Pol altu riesgu esistente de garrar el COVID-19 nestos tramos d'edá. El martes rexistráronse 149 casos, con una positividá del 6,55 por cientu.

La Conseyería de Salú amplió'l cribáu a los 35 años perriba y a los 12 perbaxo. Hasta'l momentu ésti taba dirixíu a les asturianes y asturianos de 15 a 30 años non vacunaos, grupu d'edá con mayores incidencies acumulaes hasta agora.

Activu dende'l 3 de xunetu, nel entamu de la cuarta fola, tien l'oxetivu de detectar posibles contaxos a tiempu y cortar l'espardimientu del coronavirus SARS-CoV-2. Agora amplíase perriba y perbaxo "pol riesgu altu de contrayer la enfermedá" coles que cuenten les persones d'estes edaes que nun tean vacunaes.

Los interesaos en participar nel cribáu pueden cubrir esti cuestionariu pa recibir cita pa una prueba PCR. Tamién pueden pidila los que dean positivu nel test d'antíxenos en farmacia.

3 finaes

A falta de la espublización de los datos oficiales de la COVID-19, Salú informó de la detección de 149 casos nuevos ayeri –l'actualización suma 1 contaxu más–. Son 48 más que'l llunes, anque con una tasa de positividá menor, del 6,55 por cientu pol 9,40 de la xornada previa.

A 7 díes esti porcentaxe yera enantes de l'actualización del 10,02 por cientu –ayeri baxó al 9,72 por cientu–. Ye'l doble del 5 por cientu que marca la Organización Mundial de la Salú (OMS) como referencia a partir de la que s'empieza a perder el control de la pandemia.

Hebo que llamentar na xornada la muerte de trés muyeres de 100, 88 y 88 años. Aumenten la cantidá total de finaos nel andanciu a 2.025.

114 pacientes tán hospitalizaos con confirmación o sospecha de COVID-19, 2 más que'l llunes. Otros 35 siguen na UCI, mesma cifra que na actualización última.

Na semeya, Autocovid asitiáu na esplanada de la Escuela Superior de Marina, en Xixón.