El CP Sabugo recupera la cultura de la rucha na ría d’Avilés na so folixa de llegada de la primavera

El mantegáu d’Avilés nun faltó nel Xaréu Primavera, folixa cola que les escolines y escolinos del CP Sabugo celebren la llegada de la estación, na qu’esti añu recuperóse la cultura de la rucha na ría d’Avilés. Tamién recordóse la lleenda de Samalandrán.

L’Asociación de Madres y Padres d’Alumnos (AMPA), el Colexu Públicu Sabugo y l’Asociación Cultura Xaréu d’Ochobre entamaron esta mañana esta fiesta pa los alumnos, que tuvo dedicada a Dolores Pulido y José Rodil, fináu nel 2010 y consideráu’l caberu rucheru de la ría d’Avilés. Según espliquen los organizadores, entiéndese por rucha “‘el conxuntu de coses que s’atopen na oriella al baxar la marea’, y alredor d’ella ñacen hestories y lleendes de pirates y pañadores de la oriella”.

“En tola mariña del Cabu Peñes, na franxa costera que va dende la ría d’Avilés hasta la ría d'Aboño, esiste la creyencia popular de rellaicionar la rucha cola piratería de mariña. La rucha fadría referencia al saquéu de barcos allancaos na mariña. Pensábase que los llugariegos encenderíen lluces, fueos y fogueres nes talayes de los cantiles pa que los navegantes desnortiaos dirixeren les sos embarcaciones escontra dalgún accidente orográficu que-yos llevase a enxorrar. Dempués, como bonos pirates de mariña, arrampuñaríen-yos tolo qu'envaloraren oportunu”, apunta la lleenda, anque lo que “sí ye una realidá, ye la tradición de dir a ‘la rucha’ como la práutica de dir a la gueta de les coses que la mar arrastra escontra la oriella en baxamar: madera, boyes, apareyos, estaches, etc.”.

Convertíos en personaxes lliterarios

“Contaxaos por esta maxa, quixemos bautizar cariñosamente a José Rodil Díaz como ‘L'últimu rucheru de la ría d'Avilés’ por ser el prostreru vecín de la ría que davezu siguía diendo a la rucha”, agora convertíu en personaxe lliterariu xunto cola so muyer Dolores, representaos cola so querida carriella y la so vieya cesta fecha de banielles, de manera respeutiva. Dambos, xunto con Samalandrán, lleenda recuperada por Xaréu d’Ochobre l’añu pasáu, repartieron güevos de chicolate y el tradicional Mantegáu d’Avilés “pa que nengún neñu o neña quede n’estes feches ensin les sos llambionaes preferies”.

A nivel educativu, amás d'una forma curiosa de conocer el nuesu pasáu y les nueses tradiciones, esti proyeutu convirtióse nuna forma de trabayar el respetu a la natura, el recicláu y la reutilización de les coses.

Na semeya, escolines y los personaxes Dolores Pulido, José Rodil y Samalandrán col mantegáu d'Avilés.