El CP Buenavista II rectifica con una nota ambigua la so carta sobre l'asignatura de Llingua Asturiana

Na mañana de la mesma xornada del llunes, día nel qu'Asturies.com espublizó'l primer casu conocíu de desinformación sobre la materia de Llingua Asturiana y Lliteratura por parte de centros educativos pal cursu próximu, el CP Buenavista II facía una rectificación de la carta unviada a los padres. Argumenta un error al utilizar la normativa anterior.

"Dicha información nun s'axusta a la normativa vixente. Dende la Secretaría del centru, llamentamos fondamente l'error cometíu na información remitida y asumimos la responsabilidá que pudiera derivase del mesmu", comienza la nota refiriéndose a la carta informativa "adicional" qu'acompañaba al impresu pa la matrícula del cursu viniente. Darréu la escuela uviedina puntualiza que dichu error vien "de la utilización equivocada de normativa anterior desfasada, por parte el Secretariu del Centru, ensin la preceptiva actualización posterior".

En concreto, refierse al currículu d'Educación Primaria nel que se contemplen "les árees del bloque d'asignatures de llibre configuración autonómica: Llingua Asturiana y Lliteratura o Cultura Asturiana, a eleición de los padres, madres o tutores llegales", fina la carta na que nun s'esplica más sobre la diferencia o conteníos de les dos materies. Una manera, ensin dulda, ambigua de rectificar la primer nota, que tuvo una amplia repercusión en redes sociales.

Nella facía referencia a un mínimu diez alumnos pa cursar asturianu, cuando yá nun esiste ratio, asina como d'ufierta "obligatoria pal centru" o que "l'horariu d'estes materies detráese fundamentalmente del tiempu asignáu a les árees llingüístiques y de Conocimientu del Mediu", nun intentu claru de facer ver que l'asignatura d'asturianu quita tiempu pa otres materies, cuando  tien como alternativa la de Cultura Asturiana.

Nun ye un casu nuevu

Tolos años existen denuncies de comunicaciones d'esti tipu en centros sobremanera concertaos, y tamién dellos públicos, coles que se fai por desinformar a les families y que l'asignatura d'asturianu tenga una matriculación mínima o mesmamente nun llegue a impartise por falta de matriculaciones. Dende Asturies.com animamos a los nuesos llectores que nel casu de conocer episodios similares nos faigan avisu d'ellos al traviés del nuesu corréu electrónicu redaccion@asturies.com o nes nueses cuentes en redes sociales pa echar voz y esparder les denuncies, como fiximos na tarde d'ayeri col casu del Buenavista II.