El contestu económicu y la financiación protagonizaron la primer sesión de trabayu entamada por Compromisu

El primer conceyu de trabayu de Compromisu por Asturies con independientes y asturianistes dientro de Podemos y les candidatures de xunidá popular trató principalmente sobre'l contestu económicu actual del país y la financiación. L'oxetivu d'estes reuniones ye contar con una voz propia dende Asturies na esperada reforma constitucional.

Esti piñu de persones esmolecíes pol futuru del país qu'acudieren a la invitación de Compromisu por Asturies plantegóse delles cuestiones "alredor del conceptu de soberanía, entendíu dende’l puntu vista de les implicaciones sociales y partiendo de que la nuesa capacidá de decidir como comunidá va ser clave n’aspeutos básicos de la nuesa calidá de vida", informen dende la organización asturianista. El primer tema qu'abrió estes sesiones de trabayu, que van tener continuidá nos meses próximos, foi'l contestu económicu actual y l'asuntu de la financiación.

"Ye evidente qu’esti ye un aspectu capital nuna posible redefinición del Estáu y del modelu autonómicu. Tolos proyectos y plantegamientos que se faigan nel ámbitu de la soberanía o l’autogobiernu ye evidente que necesiten recursos pa desarrollase. Tamién lo ye’l fechu de que les circunstancies concretes d’Asturies, como l’avieyamientu de la población o la dispersión, faen qu’esti tema seya vital", esplica a Asturies.com Yolanda González Huergo, abogada que forma parte de la llista al Senáu de la coalición Xuníos Podemos, na que participa Compromisu por Asturies.

Llinies de trabayu

Les árees de modelu territorial, el modelu de financiación, asina como les amenaces y retos a los que s’enfrenta la economía asturiana, centraron l'alderique de la sesión, na que tamién se repasaron la situación del sector mineru o siderúrxicu n’Asturies y se plantegaron delles reflexones "interesantes que puen convertise en llinies de trabayu". "La primera, y non poco importante, ye qu’una sociedá nun se pue midir namás en términos contables y que la lóxica de plegase a los porgüeyos de les grandes empreses nun tien por qué ser l’únicu camín. Anque pueda parecer chocante, una multinacional igual decide pesllar primero nel Estáu español que nel francés precisamente porque nel segundu los sueldos y los despidos son más altos", apunta González Huergo.

D'igual forma, señala que "paez que tenemos que tar dispuestos a entregalo too: mediu ambiente, sueldos, condiciones llaborales en xeneral, pa que les grandes empreses nun marchen, y esto nun tien de ser asina". Nel conceyu s'analizó tamién l’apueste "fundamental" pol I+D o "que ye preciso dar la batalla escontra la perda d’empreses de referencia p’Asturies o mirar pola compensación económica polos recursos enerxéticos que se tán usando n’otres partes del Estáu; o pola recuperación de los impuestos que se paguen n’otros sitios", amás de la falta d'apueste por sectores "que tán llamaos a ser pieza fundamental del sector económicu n’Asturies".

Próximu conceyu, a últimos de xunu

La siguiente reunión d'esti grupu de trabayu baxo'l paragües de Compromisu por Asturies va tener llugar a finales de xunu col oxetivu de siguir poniendo les bases "pa meter na axenda política temes d’interés estructural p’Asturies, que munches veces queden aparcaos polo urxente ya inmediato, modestamente y de manera abierta", señalen dende la organización asturianista.