El contautu del asturianu col castellanu protagoniza una conferencia en Galicia

|
El contautu del asturianu col castellanu protagoniza una conferencia en Galicia

Ramón d'Andrés participa nel Simposio Instituto da Lingua Galega 2018 entituláu 'Variedades lingüísticas en contacto na Península Ibérica'.

'Contactu de llingües n’Asturies: asturianu, «amestáu» y castellanu' ye'l nome de la conferencia que va poner el profesor de la Universidá d'Uviéu esta tarde a les 18 hores nel salón de graos de la Facultade de Filoloxía de la Universidade de Santiago de Compostela. Nella va afondar na rellaición ente les dos llingües que "produz dellos fenómenos típicos, unos glotolóxicos (interferencies, hibridaciones, etc.) y otros sociolóxicos, qu’entren en relación dialéctica".

"Una marcada diglosia o desequilibriu en funciones sociales fai que les influencies del castellanu seyan ininterrumpíes, invasives y progresives. En resultes, el sistema llingüísticu asturianu sufre un desgaste continuu, con una perda de diferencialidá qu’empobina a la disolución nel castellanu. Los efectos sociolóxicos son evidentes: perda de conciencia diferencial nos falantes, dialectalización, etc. Una mena d’asturianu urbanu, llamáu 'amestáu', representa la etapa intermedia ente’l sistema tradicional y la castellanización total. El rescate del asturianu tradicional (güei minoritariu) por aciu del modernu estándar académicu, plantea un escenariu nuevu na situación asturiana", resume D'Andrés la intervención.

Contador Estadistiques