El Constitucional da-y a ASIA un cuartu conceyal por Avilés que pierde'l PP

El Tribunal Constitucional estimó'l recursu de l'Agrupación Independiente d'Avilés (ASIA), que presentare reclamación por entender que-y correspondía un cuartu conceyal na Casa Conceyu d'esta ciudá que pierde'l PP. La sentencia del Constitucional, declara nules dos papeletes de votu recurríes por ASIA nel distritu 1, sección 36, Mesa A y que s'emitieren a favor de la candidatura del PP. La llista d'ASIA, candidatura encabezada pol que fuere presidente de la cámara de comerciu d'Avilés Antonio Sabino y que rexistró nes votaciones del pasáu mes de mayu una importante xuba de votos que la llevó de tener un únicu conceyal a tener cuatro, gana asina un conceyal más y dexa al PP con 8. El nuevu repartu de votos nun afecta de cualquier manera a la formación de gobiernu, teniendo'l pautu PSOE (11) y IX-BA-LV (2) mayoría nel conceyu.

El Tribunal declaró nulos los alcuerdos de la Xunta Electoral de Zona d'Avilés del 12 de xunu del 2007 y la sentencia del 29 de xunu de la Sala de lo Contencioso Alministrativo del Tribunal Superior de Xusticia d'Asturies, polo que Xuntal Electoral va tener agora de proclamar al nuevu conceyal d'ASIA, puestu que va ocupar Avelino González.

El motivu del procesu fueren dos papeletes nes que dos electores, al exercer el votu, marcaron una cruz o aspa al llau del candidatu númberu 1 de la llista del PP. El Constitucional considera qu'esta escritura ye contraria a la "prohibición d'efectuar cualquier tipu de modificación, señal, marca o tachadura o cualquier otra clase d'alteración o determinación nes papeletes de votu, al tratase precisamente de papeletes qu'incorporen llistes bloquiaes y pesllaes nes que nun se debe realizar indicación".