El conseyu políticu d'Izquierda Xunida ratificó ayeri la candidatura pa les elecciones al conceyu d'Uviéu. Alejandro Suárez, actualmente vicepresidente del Conseyu de Comunidaes Asturianes y anteriormente coordinador de la oficina d'oxeción de conciencia nel Conseyu de la Mocedá d'Asturies va encabezar una llista que tien como númberu 2 la diputada asturiana Paloma Uría, mientres que nel númberu 3 va dir José Antonio Ballesteros, representante de Los Verdes. Na llista tamién figuren la escritora Taresa Llorences o l'historiador David Ruiz .
La confirmación de la llista d'IX a l'alcaldía uvieina supón l'últimu pasu de la resquiebra ente l'agrupación uvieina d'IX encabezada pol entovía conceyal Roberto Sánchez Ramos y la mayoría que controla IX d'Asturies. Dambes partes rotagonizaron un procesu de francedura qu'entamó cuando los miembros del sector críticu, encabezaos por Francisco de Asís y Sánchez Ramos esixeron, encontándose en supuestes irregularidaes na convocatoria, la repetición del últimu congresu del Partíu Comunista d'Asturies, negándose a reconocer como secretaria xeneral del PCA a Noemí Martín. La crisis llegó a un puntu ensin torna posible cuando dambes partes s'amenazaron con llegar a los tribunales y al nomar la dirección d'IX una xestora que retiraba de toles sos responsabilidaes a la organización uvieina.