El Conseyu Escolar del Estáu inclúi la especialidá docente nel Decretu d’Especialidaes

La Permanente del Conseyu Escolar del Estáu, celebrada na mañana d’esti martes, incluyó la especialidá de Llingua Asturiana y Gallego-asturiano nel Real Decretu d’Especialidaes de la Educación Secundaria. L’órganu asesor del ministeriu que representa a tola comunidá educativa sofita un artículu pa la creación de la mesma a pidimientu de l’autonomía.

El testu de la enmienda aprobada recueye que “naquelles comunidaes autónomes nes qu’esistan llingües non oficiales que gocien de proteición oficial y formen parte del currículu, los cuerpos de catedráticos d’enseñanza secundaria y de profesores d’enseñanza secundaria podrán tener coles meses, a pidimientu de la comunidad autónoma y según necesidaes educatives, la especialidá propia de la llingua respeutiva. Les alministraciones correspondientes determinarán l’atribución docente a diches especialidaes por analoxía colo dispuesto nesti real decretu pa la especialidá de Lengua castellana y Literatura”. Esta solución llega tres la negativa del Ministeriu d’Educación, Cultura y Deporte a la creación de la especialidá de Llingua Asturiana y Gallego-asturiano y tuvo un apoyu mayoritariu na Permanente del Conseyu Escolar del Estáu d'esta mañana.

“Ye una decisión coherente con resoluciones aprobaes apocayá y qu’esponen, ensin resquiebra nenguna, la opinión y criteriu de la comunidá educativa sobre esti tema. Ye una postura que’l Gobiernu nun puede tapecer y que lu debería llevar a tresformar esta petición nuna realidá si nun quiere degradar el papel que correspuende a un órganu estatal como ye’l Conseyu Escolar”, valoren dende’l Sindicatu Unitariu Autonómu de Trabayadores de la Enseñanza d’Asturies (SUATEA), ún de les organizaciones con representación nel Conseyu Escolar del Estáu al traviés de la Confederación de Sindicatos de Trabayadores de la Enseñanza (STEs). De dar lluz verde’l ministeriu a la propuesta, esta demanda vieya del asturianismu qu’igualaría la situación de los maestros de Llingua Asturiana y Gallego-asturiano col restu del profesoráu, al tiempu que daría más estabilidá a l’asignatura, nun atoparía más torgues, dada la postura caltenida hasta la fecha nesti asuntu pola conseyera Ana González.