El Conseyu d’Europa ratifícase en pidir la oficialidá del asturianu

El Conseyu d'Europa, entidá qu'axunta a 46 estaos del continente, aprebó esti miércoles una recomendación encamentando al Estáu Español a cumplir cola Carta de Llingües Minorizaes d'Europa. Anque la resolución d'esta selmana namás fai referencia específica a cuestiones rellacionaes col vascu y col aragonés, el Conseyu d'Europa fai nel cuerpu del informe, que se redactó nel mes d'abril, delles consideraciones sobre l'asturianu.

Ello ye que nel casu d'Asturies, el Conseyu d'Europa, que recueye nun completu informe tola llexislación y documentación esistente sobre la llingua rescampla que na visita de campu del equipu d'espertos del Conseyu estos decatáronse de qu'esistía n'asturies " una insatisfacción fonda pol fechu de que nun se reconociere la cooficialidá del asturianu" Los espertos de la UE acusen a la falta d'oficialidá como la única torga y circunstancia que nun concueya "coles demás midíes que se tan adoptando, sobremanera nel ámbitu de l'alministración" faciendo referencia esplícita a que la llei d'Usu nun va poder aplicase en tolos sos casos nin desarrollase dafechu hasta que nun haya oficialidá. La falta d'una titulación de Filoloxía Asturiana, la escasa presencia del asturianu nos medios y el fechu de que l'asturianu na enseñanza sía una asignatura optativa en competencia con otres tamié se sorrayen dende'l COE como torgues a la llingua que sedría preciso desaniciar.

El siguimientu que se fai dende la entidá europea del cumplimientu de la Carta de Llingües Minorizaes pue vese al traviés de los sos documentos orixinales. Nesta páxina alcuéntrense los enllaces a los trés documentos en formatu .pdf esistentes hasta agora, l'informe preliminar del 2002, el segundu informe del mes d'abril y la última resolución d'esta selmana, neto que los documentos equivalentes que faen referencia a los demás estaos del continente asociaos al COE.