El Conseyu de Gobiernu concede la Medaya d'Oru d'Asturies a los descubridores de Tito Bustillo y a los centros asturianos centenarios

Diego Canga Fano, Jesús María Otero Hernández, l'Hospital Universitariu de Cabueñes, La Federación de Cofradíes de Pescadores y la Sociedá de Pescadores Las Mestas del Narcea van recibir les distinciones de plata.

Los descubridores de la cueva de Tito Bustillo (Pozu'l Ramu) van recibir la Medaya d'Oru d'Asturies nel 50 aniversariu del so afayu por favorecer la conocencia pública d'unu de los xacimientos d'arte rupestre más relevantes d'Europa, convertíu güei n'enclave de referencia internacional pol so conxuntu artísticu únicu.

Los mozos qu'integraron el grupu qu'afayó la cueva'l 11 d'abril de 1968 son Ruperto Álvarez Romero, Eloisa Fernández Bustillo, Jesús Manuel Fernández Malvárez, Pilar González Salas, Adolfo Inda Sanjuán, Amparo Izquierdo Vallina, María Pía Posada Miranda, Elías Pedro Ramos Cabrero, Celestino Fernández Bustillo y Fernando López Marcos; estos dos últimos, yá finaos.

El Conseyu de Gobiernu tamién decidió conceder la Medaya d'Oru d'Asturies a los centros asturianos centenarios pola so importancia histórica, el so llabor fundamental de sofitu a la emigración y la so estraordinaria vocación solidaria. Tamién por siguir cola tresmisión de valores que faen úniques a les coleutividaes d'Asturies en tol mundu.

Con esta decisión, el Gobiernu rinde homenaxe al Centru Asturianu de México, Centru Mocedá Asturiana de Siero y Noreña en Buenos Aires, Asociación Civil Unión y Progreso Social y Recreativa Residentes del Conceyu de Degaña na República Arxentina, Sociedaes, Clubes y Uniones de L'Habana, Centru Asturianu de Bonos Aires, Centru Asturianu de Mar de la Plata, Centru Asturianu Casa d'Asturies del Uruguai, Centru Asturianu de Santa Fe, Centru Asturianu de Rosario, Centru Asturianu de Tampa y Centru Asturianu de Madrid.

Semeya: Conseyu de Gobiernu del 8 d'agostu de 2018