El Conseyu de Gobiernu aprobó les subvenciones pa les oficines de normalización

El Conseyu de Gobiernu del Principáu d'Asturies aprobó esti miércoles 29 de marzu una subvención per importe de 141.000 euros empobinada a financiar los costes de los programes entamaos poles oficines de normalización de los conceyos de L.lena, Cangas del Narcea, Samartín del Rei Aurelio, Llangréu, Mieres, Siero, Avilés, Mancomunidá del Cabu Peñes y Mancomunidá de la Comarca de la Sidra.

Esta subvención desatranca la puesta en serviciu de les oficines de normalización de Mieres, Samartín del Rei Aurelio, Avilés y Llangréu, que va pocos díes denunciaren los trabayadores d'oficines de servicios de normalización que llevaben meses ensin funcionar.

Sicasí, la partida presupuestaria más alta que se-y autorizó esta mañana a Cultura foi per importe de 241.920 euros, en conceptu d'amestadura al conveniu pol que funcionen les oficines d'información turística de los conceyos de Xixón, Avilés, Cangues d'Onís, Cangas del Narcea, Llaviana y Taramunde.

Tamién se-yos dio'l preste a delles partíes presupuestaries más con cargu a la Conseyería de Cultura, ente elles un conveniu cola Universidá d'Uviéu y l'Asociación DANAE por importe de 60.000 euros pal desarrollu del proyectu espositivu "Artransmedia 2006" o una ayuda de de 30.368 euros al Conceyu de Bimenes pa les obres de la Casa de Cultura, ello aparte d'otros 77.000 euros en conceptu de subvenciones pa delles de les fiestes y actos deportivos más famosos del branu astur, ente elles les fiestes de los Güevos Pintos y del Carmín de La Pola Siero, el descensu del Sella y el descensu a nadu de la Ría del Navia.

Otramiente, los espedientes toponímicos d'Ayer y Nava, que lleven esperando pol trámite definitivu pa la so aprobación dende'l mes de xineru, tampoco pasaron güei per Conseyu de Gobiernu, onde'l mesmu conceyu ayerán yá contaba con que se trataren va quince díes.