El conseyu d'alministración de Vipasa cesa al direutor xerente y saca la so plaza a concursu públicu

Jesús Ramón García García dexó'l cargu de xerente de Viviendes del Principáu d'Asturies (Vipasa) por decisión unánime del conseyu d'alministración. Pa primeros d'agostu ta prevista la convocatoria d'un concursu públicu pa cubrir esti puestu na empresa.

La intención d'esti cambiu ye "dar un impulsu mayor a Vipasa, como principal preséu pa llevar alantre les polítiques en materia de vivienda n'Asturies", según espliquen dende la Conseyería de Servicios y Derechos Sociales. La sociedá va tener protagonismu especial a la hora de "desenvolver el programa de garantía habitacional, el programa d'intermediación nel arriendu y na coordinación colos conceyos pa l'axudicación de les viviendes que se vaigan reparando".

L'hasta agora xerente yera, xunto a Graciela Blanco, lo que quedaba del equipu d'Esther Díaz nos organismos que xestiona'l departamentu agora lideráu por Pilar Varela. El PP nel 2013 yá solicitara'l so cese al considerar que foi un nomamientu a deu de la ex alcaldesa de Llangréu.