El Conseyu Asesor de la Llingua de Xixón xustifica la so dimisión en bloque "pa nun ser cómplice" de la falta de normalización del asturianu na ciudá

Dempués de presentar la selmana pasada la so dimisión en bloque, los miembros del Conseyu Asesor de la Oficina de la Llingua de Xixón dieron ayeri una rueda de prensa pa esplicar la so decisión y na que tamién retrucaron a les crítiques que-yos fexeron los representantes d'IX-BA na casa conceyu de Xixón en conocíendose la mesma.


Al actu asistieron representantes de los sindicatos Suatea, CCOO y UXT, de la Xunta Pola Defensa de la Llingua Asturiana y l'Academia de la Llingua, la Tertulia Cultural "El Garrapiellu y el Foru Arte Ciudá. L'aprobación de les ordenances d'usu del asturianu, documentu base p'apautar el marcu d'usu del idioma en conceyu, apaeció claramente na rueda de prensa como'l detonante de la dimisión en bloque de tol conseyu asesor, organismu qu'ellaborare la propuesta d'ordenances que l'equipu de gobiernu del conceyu nun atendió. Los representantes del Conseyu Asesor esplicaron como los aplazamientos por parte del Conceyu a la cuestión de les ordenances acabaron nuna renuncia esplícita por parte del grupu del PSOE de Xixón a tratales "en cuantes que significaben un reconocimientu implícitu de la oficialidá". Ánxel Nava, qu'actuó como portavoz de tol Conseyu Asesor, comentó que, dempués de presentase'l documentu base de les Ordenances d'Usu, cabía una negociación del mesmu p'apautar plazos y estratexes pa la so aplicación. Encuenta d'ello, la rempuesta foi el "silenciu alministrativu" por parte del equipu de gobiernu, que "nun entró nin siquiera a esta negociación pa llegar a un consensu". Énte esta situación, el pasáu mes d'abril, el Conseyu Asesor emitiere un ultimatum pa que se tratare la cuestión, presentando la so dimisión irrevocable la selmana pasada dempués d'ocho meses ensin rempuesta.


En rempuesta a les crítiques de los conceyales d'IX-BA Jesús Montes Estrada y Carmen Rúa, que calificaron de "poco valiente" la dimisión y que pidieron que nun se xulgare a IX-BA, que ye parte del equipu de gobiernu de Xixón, cola mesma dureza qu'al PSOE, Urbano Rodríguez, representante de l'Academia de la Llingua nel organismu dimisionariu, esplicó que "pola so negativa a tratar el tema, el PSOE ye culpable", pero amestó que "la responsabilidá ye compartida nesta cuestión" polo tamién tocaba echá-yos la so parte de culpa a IX-BA por nun apertar sobre los sos socios de gobiernu. Urbano Rodríguez esplicó que tampoco podía calificase la so decisión de dimitir de "poco valiente y poco honesta" cuando "se-yos dio un plazu d'ocho meses pa qu'entornaren la situación ensin que se diere avance nengún".

La falta de compromisu n'aplicación de la recuperación por parte del Gobiernu asturianu de la toponimia tradicional del conceyu, que se señaló como "lo más importante" que se llogró nesta llexislatura o la reducción de la Oficina de la Llingua a un organismu que namás fai "aparentes campañes publicitaries", ello con defendese'l trabayu de los que la lleven, tamién apaecieron nes argumentaciones de los miembros del Conseyu pa presentar la dimisión.

Los miembros del Conseyu interpretaron en clave mui crítica la negativa del PSOE de Xixón a tratar les ordenances del asturianu, en cuantes que-yos abulta que "los socialistes albidraron que, en dándo-yos el preste en Xixón, una riestra de conceyos diben aprobar documentos asemeyaos", dalgo qu'asustó nel Ayuntamientu, y valoren que, con esta negativa, el Conceyu de Xixón caltién una "resquiebra ente "ciudadanos de primera y de segunda no tocante a derechos llingüísticos", una "discriminación de la que nun queremos ser cómplices" según aseguraron "participando nún organismu que ye un elementu decorativu" en palabres del representante de SUATEA Berto Cobreros.