El Conseyu Asesor de la Llingua de Xixón abriráse a les organizaciones que trabayen pol asturianu

La propuesta de la XDLA de modificar los estatutos del Conseyu Asesor de la Llingua de Xixón saldrá alantre. Tolos presentes nun punxeron torgues a que les organizaciones que trabayen pol asturianu pasen a formar parte de la entidá.

Xulio Casado y Susana Fernández González foron los representantes de la Xunta pola Defensa de la Llingua Asturiana (XDLA) na reunión celebrada’l martes nel Centru de Cultura Antiguu Institutu que treslladaron a los miembros del Conseyu Asesor de la Llingua la necesidá de que les organizaciones que trabayen pol asturianu formaren parte de la entidá xunto colos qu’establez dende’l 2008 los sos estatutos: l’alcalde/alcaldesa o la persona na que delegue, que preside’l Conseyu; Oficina Municipal de la Llingua; tolos grupos municipales; Conseyería d’Educación, Cultura y Deporte; Conseyu de la Mocedá de Xixón; Academia de la Llingua Asturiana; Federación de Asociaciones de Vecinos de Gijón (FAV); Federación de Asociaciones de Vecinos Rurales de Gijón ‘Les Caseríes’; Comisiones Obreres; UXT; USO; SUATEA; Asociación Empresarial de Hostelería de Gijón, Carreño y Villaviciosa; y dos persones “de reconocíu prestixu y dedicación a los llabores rellacionaos coles funciones del Conseyu”. Amás, nesta ocasión, convidóse tamién a L’Asociación Cultural L’Arribada, l’Asociación Cultural N’Ast, Iniciativa pol Asturianu y la Tertulia Cultural El Garrapiellu –que nun unvió representante–, coleutivos que la XDLA considera qu’han de tar de manera permanente nel Conseyu Asesor.

“Nun fiximos nenguna otra propuesta que nun fora la de camudar los estatutos”, señaló Casado, que considera que les organizaciones que tán trabayando pol asturianu “han de tar de plenu derechu” na entidá, esto ye, tener votu. Les esplicaciones de los representantes de la XDLA paez que convencieron al restu de presentes, que nun punxeron torgues a la propuesta. Asina, esti coleutivu ha de presenta de manera formal la so propuesta enantes de la reunión próxima del Conseyu, previstu pa mediaos de payares, pa qu’una comisión estudie esta modificación de los estatutos.

Otra manera, na reunión del Antiguu Institutu, presidida por Carlos Rubiera, conceyal d’Educación, Cultura, Mocedá y Festexos, tamién se trataron otros asuntos venceyaos cola situación del asturianu nel conceyu, como ye’l casu de la mengua del usu del idioma dende l’Ayuntamientu y el retrocesu na normalización toponímica. Nesti puntu últimu, denuncióse que los autobuses d’EMTUSA, que veníen usando los nomes tradicionales, tornen a usar los castellanos, yá non oficiales.