El conseyeru d’Educación considera “modélica” l’axudicación d’interinos

Genaro Alonso axuntóse colos equipos directivos de los centros escolares pa programar l’añu académicu. La inauguración del cursu de Primaria va tener llugar el 10 de setiembre en Beleño y la de Secundaria’l 14 en Navia.

El conseyeru d'Educación y Cultura, Genaro Alonso, anunció güei que la inauguración del cursu n'Infantil y Primaria va tener llugar el próximu 10 de setiembre nel aula de Beleñ0, perteneciente al Colexu Rural Axuntáu (CRA) Picos d'Europa, en Ponga, y la de Secundaria'l día 14 nel IES Galiléu Galilei, en Navia. El conseyeru, que caltuvo los alcuentros d'entamu de cursu colos equipos directivos de Primaria y Secundaria, avanzó que'l cursu va arrincar n'Asturies con 1.086 estudiantes menos na etapa d'Infantil y Primaria.

Tocantes a l'axudicación d'interinos, el conseyeru aseguró que foi un procedimientu afayadizu y modélicu ” tanto en forma como en conteníu. “Axudiquemos 3.000 vacantes en tiempu y forma y non solo saquemos les vacantes que taben consolidaes, sinón tamién una trentena d'elles que correspuenden a personal qu'entá ta n'activu, pero que se prevé la so xubilación nel mes de setiembre”.

Respectu al descensu demográficu, Alonso indicó qu'afecta, sobremanera, a los neños qu'empecipien el períodu escolar con trés años, onde se rexistra un descensu de 800 alumnos, lo qu'implica una cayida de 40 unidaes, con una mayor repercusión nos centros públicos. “Dende la Conseyería siempre defendimos que la cayida de la natalidá tien que soportala tamién la rede privada concertada y non solo la pública”, señaló.

En concreto, el cursu empieza n'Asturies con 66.464 estudiantes matriculaos n'Infantil y Primaria. Les unidaes caltiénense en Primaria y aumentaron en Secundaria.

Per otra parte, el día 19 de setiembre va tener llugar la inauguración del cursu de Formación Profesional nel IES Sánchez Lastra, de Mieres, y el d'Enseñances Artístiques el día 20 na Escuela d'Arte d'Uviéu.

Semeya: Conceyu colos centros