El Consejo de la Juventud de España sofita la oficialidá y la normalización del idioma

|
Comisión permanente del Consejo de la Juventud de España

El Conseyu de la Mocedá del Principáu d'Asturies (CMPA) presentó una enmienda al respeuto na asamblea del coleutivu estatal.

Álvaro Granda, presidente del CMPA, encargóse de defendela, algamando'l sofitu del 78,25 por cientu de los votos de los representantes de los más de 60 coleutivos del Consejo de la Juventud de España (CJE) presentes. En concreto, solicitaba la oficialidá del asturianu y la so normalización llingüística.

Nuevas Generaciones (NN GG) y les xuventúes de Ciudadanos posicionáronse en contra de la enmienda. Les mocedaes del Partido Popular n'Asturies asoleyaron inclusive un comunicáu nel que fala de "imposición" y de "trampa montada por el Consejo de la Juventud de Asturias y vendida a la luz pública, cómo no, por ese ente pseudonacionalista llamado Iniciativa pol Asturianu".

El coleutivu que trabaya pola normalización del idioma reclamó "respetu" a NN GG de Asturias y recordó que ye una organización "apartidista" que "siempres trató con respetu y educación al PP y NN GG, anque discrepemos. Pidimos que retiren esi calificativu y recordamos que tamos abierto a esplica-yos lo que supón la oficialidá, que por ciertu apliquen con normalidá dende'l so partíu al otru llau de la Ría del Eo".

D'igual forma, Iniciativa pol Asturianu felicita al CJE "pol gran sofitu dau a la oficialidá, amuesa de que les xeneraciones más moces tán d'alcuerdu dafechu col cambiu de status xurídico pa la llingua asturiana que marca la Constitución española nel so artículu 3.2.". Otra manera, Manuel Ramos de la Rosa, d'ASDE Scouts de España, resultó escoyíu presidente del coleutivu estatal nel mesmu marcu de l'Asamblea Xeneral Estraordinaria celebrada'l sábadu en Madrid.

Na semeya, Comisión Permanente de la CJE salida de l'Asamblea Xeneral Estraordinaria del coleutivu estatal.

 

Contador Estadistiques