El Congresu modifica la Llei Eleutoral pa evitar unes posibles eleiciones el 25 d'avientu

El domingu va decidise la posición del PSOE nun Comité Federal na posible segunda sesión d’investidura de Mariano Rajoy. Mientres, los socialistes, el PP, Ciudadanos, Foro, UPN y CC-PNC aprobaron una modificación de la Llei Eleutoral pa evitar eleiciones en Navidá.

Ésta consiste nuna reforma llendada de la norma cola fin d’acortiar plazos y trámites nel casu d’una repetición d’eleiciones y reducir gastos, con un recorte del 30 por ciento de les subvenciones por escañu y votu. Tamién afita una mengua a la metá de les campañes entamaes nestos procesos eleutorales más curtíos.

Estes modificaciones, que sólo tendrán validez nel casu nunca dau en democracia hasta l’añu pasáu de la convocatoria d’eleiciones tres la imposibilidá de conformar Gobiernu, ha de pasar agora pol Senáu. Na votación del Congresu aprobóse ensin nengún votu en contra, pero cola astención de Xuníos Podemos y del restu de formaciones del arcu parllamentariu a esceición del PSOE, PP, Ciudadanos, Foro, UPN y Coalición Canaria-Partido Nacionalista Canario (CC-PNC).

Asina evitaríase que los ciudadanos tuvieren qu’acudir a les urnes el 25 d’avientu, día de Navidá, fecha prevista según los plazos actuales de la Llei Eleutoral nel casu de que’l 31 d’ochobre nun hubiera Gobiernu. Sicasí, previsiblemente nun será necesario si’l Comité Federal del PSOE decide esti domingu l’astención nuna segunda sesión d’investidura de Mariano Rajoy como presidente del Gobiernu.

Fernández, pola astención

Javier Fernández, presidente d’Asturies y de la xestora que dirixe’l PSOE, defendió güei l’astención na segunda votación de la investidura tres una votación en contra na primera p’amosar el refugu del partíu a les polítiques del PP. El PSC ye la federación que más s’opón a l’astención, postura que defenden los socialistes d’Andalucía y que nun tien bona aceptación ente les bases.