El Congresu Cultura Asturiana Mozo avanza parte del so programa

Na mañana del sábadu va celebrase nel Auditoriu d’Uviéu’l I Congresu Cultura Asturiana Mozo, del que yá se conoz un avance del programa. La inauguración de la xornada, que va zarrase con un alderique xeneral, ta prevista pa les 11 hores.

El I Congresu Cultura Asturiana Mozo trátase d’una iniciativa impulsada pola Asociación Cultural L’Arribada y la Fundación Nueva Asturies que cuenta cola collaboración de delles personalidaes de la cultura asturiana. El so oxetivu ye axuntar a xente mozo que desendolca’l so llabor dientro del ámbitu de la cultura asturiana cola intención de facer visible a la sociedá asturiana la cantidá grande de persones que trabayen nesti área, asina como les posibilidaes de creación de riqueza y emplegu que tien el mundu cultural asturianu. D’igual forma, pretende quitar la etiqueta folclórica que caltién y dar una imaxe de modernidá más averada a la realidá. Otra manera, yá de manera interna, esti congresu espera servir d’aliciente a toles persones que desendolquen la so carrera porfesional nesti ámbitu pa continuar col so trabayu.

Según l’avance del programa que se dio a conocer –tovía provisional, yá que s'espera la incorporación de nuevos conferenciantes–, l’apertura de puertes pa retirar les acreditaciones va facese a les 10.30 hores, dao que la inauguración ta prevista pa les 11 hores, actu que va contar cola presencia de Xuan Xosé Sánchez Vicente, en nome de la organización, y de representantes políticos, pa lo que se convidó a l’alcalde d’Uviéu, Agustín Iglesias Caunedo, y a la conseyera d’Educación, Cultura y Deporte, Ana González. Los medios de comunicación van ser el primer asuntu a tratar, con ponencies sobre radio con Nacio Varillas (Radio Langreo-RPA), Xurde Morán (Cadena SER) y Kike Carballeira (Onda Cero), pa llueu tratar la situación de los nuevos realizadores y la ufierta audiovisual con Illán Gonzali, y d'Internet con Fernando de la Fuente Trabanco, que va presentar un videu sobre la importancia que tuvo la rede pa les cultures y llingües minorizaes. El direutor d'Asturies.com va tar acompañáu por David Melendi, profesor del departamentu d'Informática de la Universidá d'Uviéu y miembru de l'ALLA, que va falar sobre delles esperiencies como Eslema, y  Xesús González, de Softastur. Tres caún de les estayes va celebrase un alderique d'unos quince minutos de llargor.

La siguiente, a partir de les 12.15 hores, va centrase na música y la llingua, con ponencies sobre bandes de gaites y agrupaciones folclóriqes nes que van participar  Bras Rodrigo (Banda Gaites Corvera), Aitor García (La Flor del Pumar) y Javier Pellico (Agrupación Folclórica Los Picos d'Europa), pa depués dar pasu a Pablo A. Quiroga, que va falar sobre’l modelu de la productora que dirixe, Algamar, y a Inaciu Galán, que va dar una conferencia sobre organizaciones de defensa de la llingua y dinamización cultural. Tres un descansu, a les 13.30 hores va principiar la serie última de conferencies, na que van participar Lluis Antón González (teatru), Rafa R. Valdés (investigación y revistes) y Sofía Castañón (lliteratura). A les 14.15 hores ta previsto un alderique xeneral col que se va zarrar, alredor de les 15 hores, esti I Congresu Cultura Asturiana Mozo.