El Congresu aprueba por unanimidá'l trámite pa derogar el votu rogáu

|
Congresu

Tolos grupos políticos del Congresu posicionáronse a favor d'eliminar el votu rogáu del Rexime Eleutoral Xeneral. Esta figura tan criticada pola emigración afitóse nel 2011, provocando una cayida importante de la partipación de los residentes nel esterior nes cites eleutorales: del 31,88 por cientu baxó a cerca del 5 por cientu.

PSOE y PP por fin escucharon les demandes de los residentes nel esterior pa eliminar el votu rogáu como condición pa participar nes eleiciones. Esti pasu provoca munches molesties a los votantes, que tienen que solicitar exercer el so derechu, a lo que se suma problemes nos plazos d'unvíos llegando en munches ocasiones les papeletes fuera de tiempu.

La so aprobación nel 2011 que, como recordó Ana María Oramas, diputada de Coalición Canarias, namái tuvo la oposición del so partíu y Izquierda Xunida, llevó a un descensu de la participación ente los emigrantes, pasando d'un 31,88 por cientu nes Estatales del 2008 a entre el 4,73 y el 6,8 por cientu nes siguientes. Una situación qu'agora'l propiu PSOE pretende iguar con una propuesta pa la modificación del artículu 75 del Rexime Eleutoral Xeneral pa suprimir el votu rogáu que presentó xunto con Xuníes Podemos y que garantizó la selmana pasada'l sofitu del PP.

L'aprobación ayeri por unanimidá nel Congresu fai qu'entame'l trámite pa esti cambiu que tamién introduz l'usu d'una papeleta que se podrá descargar de manera telemática pa "adelantar los plazos d'unvíu de la documentación eleutoral", qu'amplía tamién de 3 a 5 díes. Otra manera, el testu aumenta de 3 a 7 díes los plazos pal depósitu del votu n'urna, y de 3 a 5 los de l'apertura de los votos emitíos dende l'estranxeru, retrasando nel mesmu intervalu'l plazu del escrutiniu xeneral.

Lo que sí se caltién ye'l sistema d'identificación de los votantes introducíu na reforma del 2011, yá que siguirá siendo obligatoriu incluyir nel sobre xunto al que guarda'l votu, una fotocopia del pasaporte o del DNI o, nel so defeutu, certificación d'inscripción nel Rexistru de Matrícula Consular.

Los pasos siguientes

Superáu'l primer esame parllamentariu, la Mesa de la Cámara acordará'l so unvíu a la Comisión competente y l'apertura del correspondiente plazu de presentación d'enmiendes, 15 díes prorrogables. Según l'artículo 126.5 del Reglamento del Congreso, podrán presentase enmiendes a la totalidá de testu alternatiuo o enmiendes al articuláu.

Nel casu de presentase enmiendes a la totalidá, el testu deberá superar l'alderique de totalidá énte'l Plenu. Posteriormente, la iniciativa continuará su tramitación en Comisión.

Na semeya, el Congresu ayeri.

 

Contador Estadistiques