El Congresu aprueba l’Impuestu sobre’l Patrimoniu nuevu

Los votos a favor del PSOE, ERC, IX, ICV, BNG y Nafarroa Bai permitió l’aprobación del Impuestu sobre’l Patrimoniu nuevu qu’impulsó’l Gobiernu de Zapatero. Ésti va tener vixencia nel 2011 y 2012 pa patrimonios de más de 700.000 euros.
 
L’aprobación del impuestu salió alantre con 176 votos a favor y la oposición de dos diputaos, ún del PSOE y otru del PP, previsiblemente por error. Mentes, 166 políticos pertenecientes al PP, PNV, CC y CiU optaron pola astención. Pese a tener la mayoría suficiente pa sacar alantre la norma, el PSOE recibió crítiques pola so manera de proceder al instaurar l’Impuestu sobre’l Patriminiu dos meses enantes de la celebración de les eleiciones anticipaes. Asina, toles formaciones que votaron a favor criticaron l’actitú eleutoralista del PSOE nes sos intervenciones nel caberu Plenu del Congresu nesta llexislatura.
 
L’aplicación d’esti impuestu va quedar agora en manes de les comunidaes autónomes. Nel casu d’Asturies, tovía nun ye seguro que Francisco Álvarez-Cascos vaya aplicala o non. De momento, el presidente del país yá amosó’l so refugu a la norma, anque aseguró nun ser partidariu de la insumisión.