El Congresu aprueba aniciar los trámites pa paralizar la LOMCE

Una proposición de llei presentada pol PSOE pa paralizar la LOMCE contó col apoyu de la mayoría del Congresu, siendo los únicos votos en contra los del PP y Foro. El ministru Méndez de Vigo anunció qu’esti procesu va facese al traviés d’un decretu llei, más inmediatu.

D’esta forma, quedaríen paralizaes los efeutos académicos de les evaluaciones d’ESO y Bachilleratu, anque ésta última sí que contará pa poder acceder a la universidá. El ministru d’Educación, Cultura y Deporte, Íñigo Méndez de Vigo, va firmar dichu decretu llei’l día 28, cuando se va celebrar la Conferencia Sectorial d’Educación, anque ésti nun entrará en vigor hasta avientu.

D’esta forma, quedará paralizada la LOMCE hasta l’algame d’un pautu estatal pola Educación, tal y como se comprometió Mariano Rajoy na so investidura como presidente. La votación en contra ayeri del so grupu argumentóse en que nun tán d’alcuerdu colos tiempos; que pa frenar la Llei Orgánica de Meyora de la Calidá Educativa (LOMCE) ye necesario poner en marcha’l pautu d’Estáu.

Primer derrota popular

La propuesta socialista contó con 208 votos a favor, dos astenciones y 133 en contra, los correspondientes al Partido Popular (PP) y a Foro, formaciones que se presentaron en coalición n’Asturies. Ésta ye la primer derrota popular nel Congresu de la llexislatura actual, que va tar marcada pola necesidá d’alcuerdos tres cuatro años de mayoría absoluta y ún de Gobiernu en funciones.

El PSOE ve nesta vía una manera de condicionar les polítiques del Gobiernu que permitió cola so astención, anque pa otres formaciones, como Podemos, nun ye una solución, yá que, por exemplu nesti casu, nun deroga la LOMCE.