El congresu “Ciencia, Llingua y Fronteres” inaugúrase’l día 5

El congresu “Ciencia, Llingua y Fronteres” va inaugurase’l martes 5 n’Uviéu. Nél van partipar pel momentu dellos cargaos venceyaos a la Universidá, el Departamentu de Filoloxía Española, el Principáu y el Conceyu d’Uviéu.

El Rector de la Universidá d'Uviéu, Vicente Gotor; el Director del Departamentu de Filoloxía Española, la Directora Xeneral de Política Llingüística, Consuelo Vega; y el Conceyal de Cultura del Conceyu d'Uviéu, José Suárez Arias-Cachero van inaugurar el martes día 5 a les 9.30 de la mañana, na Sala de Conseyos del Departamentu de Filoloxía Española, el congresu “Ciencia, Llingua y Fronteres”.

"¿Tien sentíu'l conceptu de llingua (o dialectu)?”, “¿Cómo se conciben les fronteres ente llingües (o ente dialectos)?”, son dalgunes de les entrugues presentaes nel programa del Congresu y sobre les que se va aldericar. L’oxetivu ye reflexonar de problemes sobre llingüística, una ciencia que “de siempre, tien enfrentáose al problema de clasificar y tipificar la diversidá llingüística mundial”, esplica’l citáu programa.

Nesti debate van participar especialistes asturianos, españoles y europeos en Llingüística Xeneral, en Romanística, en Dialectoloxía Hispánica, Gallego-Portuguesa y Asturlleonesa. Amás, destaca tamién el Congresu pola presencia de xente esperto en Filosofía del Llinguaxe, Antropoloxía o Biología, disciplines “que comparten delles de les esmoliciones alredor del conceptu de tipu y frontera”, según la organización.

Inscripciones
La inscripción nesti Congresu “Ciencia, llingua y fronteres” tiene un preciu de 10 euros y hai que facela enantes del 4 d'ochobre. Les persones inscrites van recibir un certificáu d’asistencia.