El Conciertu pola Oficialidá, más grande que nunca

La Xunta pola Defensa de la Llingua ta acabante de presentar el cartel del Conciertu pola Oficialidá d'anguaño. Ocho grupos y dos escenarios grandes convierten al conciertu de 2006 nel mayor hasta la fecha no tocante a medios

El conciertu va ser el próximu 29 d'abril nel Campus d'Humanidaes d'Uviéu. Ellí va haber una carpa instalada p'abellugar al públicu de la posible lluvia, amás de dos escenarios esteriores cola so propia cubrición. La instalación de dos escenarios va ser la mayor novedá d'esti conciertu, cola que se quier dar axilidá a les actuaciones de los grupos, ye dicir, eliminar los tiempos muertos ente grupu y grupu. D'esta manera'l próximu 29 van poder sentise ocho grupos casi de siguío, ocho grupos nos que por primera vez na historia del conciertu hai más d'estilos estremaos del folk que de folk. Ello ye que per un llau van tocar Skama la Rede, Dixebra, OI N'AST! y Toli Morilla, mientres que con un corte más folk van tar Corquiéu, DRD y la Col.lá Propinde, amás del hip-hop n'asturianu del grupu K-Nalón, formáu pol cantante Tori y por Ceeris, autor de les bases rítmiques.

D'equí a poco van poder mercase les entraes pal conciertu en puntos de venta per tol país, a un preciu de 4 €, un euru más barata que na puerta del Conciertu pola Oficialidá.