El Conceyu Universitariu pol Asturianu denuncia un nuevu casu de represión llingüística na universidá

Un alumnu de la Facultá de Maxisteriu recibió una llamada de la Secretaría de la entidá increpándolu por presentar unos documentos n’asturianu. Según dixo la trabayadora de la Facultá, elles “nun tienen por qué saber bable.”

L’alumnu recordó-y a l’alministrativa, que nun s’identificó, que los Estatutos de la Universidá d'Uviéu dicen nel so artículu 6.2 que naide podrá ser discrimináu por usar l’asturianu. Amás, la Llei d'Usu del Asturianu diz nel so artículu cuartu que tolos ciudadanos tienen derechu a emplegar la llingua asturiana y a espresase nella, de palabra y por escrito y que va tenese por válidu a tolos efectos l'usu del asturianu nes comunicaciones orales o escrites de los ciudadanos col Principáu d'Asturies. Con too y con eso, l’administrativa nun quixo atender a los razonamientos llegales y esixó-y al alumnu que nunca más presentara un documento n’esta llingua, dexando claro que “nun permitiríen nengún documentu más n’asturianu na Facultá”. Darréu colgó’l teléfonu argumentando que nun-y entendía lo que dicía.

L’alumnu yá presentó una quexa énte’l Decanu y tamién ente’l Defensor del Universitariu y el Defensor del Pueblu. Xúnese asina a la denuncia del Conceyu Universitariu pol Asturianu, que reclama una mayor sensibilización per parte de la Universidá d’Uviéu. Pal CUPA esti casu “nun ye más que l’amuesa de munchos otros qu’asocende cada día nesta institución y que marxinen a los estudiantes que deciden usar l’asturianu nel so día a día, pesie a lo que dicen los Estatutos de la Universidá, publicaos tamién n’asturianu.”