El Conceyu d’Uviéu elimina les partíes pal asturianu

PP y Ciudadanos, partíos nel gobiernu municipal del Conceyu d’Uviéu, eliminen les partíes a la llingua asturiana nos presupuestos de Cultura pal 2020 magar qu’éstos medren. El PSOE y Somos Uviéu criticaron la falta de compromisu del bipartitu pa cola cultura asturiana y l’idioma, y la XDLA fala de “despreciu al asturianu”.

“El determín de PP y Ciudadanos d’amortizar la plaza de coordinador en Llingua Asturiana na ufierta pública d’emplegu del Conceyu d’Uviéu y de quitar la subvención prevista a l’Academia de la Llingua Asturiana ye una demostración de qué clas de política llingüística quieren facer los partíos de la derecha: la del despreciu más absolutu, la de nun gastar un euru nello”, aseguren dende’l coleutivu cívicu. Denuncien que “anque pa los poderes públicos haya una obligación por llei de velar por esi patrimoniu cultural” los presupuestos de Cultura inoren dafechu al asturianu.

El PSOE coincide cola Xunta pola Defensa de la Llingua Asturiana (XLDA) en definir como “despreciu” al idioma les cuentes del gobiernu municipal y entrúgase cómo va cumplir cola Llei d’Usu y Promoción del Bable/Asturianu. Mentes, Somos Uviéu llamenta la “falta de sofitu total” a la cultura y les tradiciones asturianes nos prespuestos, y falen de falta de tresperencia nes cuentes.

La conceyalía nueva separtó les partíes destinaes a Cultura y Festexos, dalgo que nun se facía dende’l 2016. Na primer estaya recueye un aumentu de 800.000 euros con respeuto a esi añu hasta sumar un total de 11,7 millones, de los que l’asturianu nun va recibir nin un céntimu.

Na semeya, el conceyal d'Educación, Cultura, Centros Sociales, Salú Pública y Consumu, José Luis Costillas (Ciudadanos), y el d'Economía, Tresformación Social y Comunicación, Javier Cuesta (Partido Popular), nel momentu de presentar les cuentes.