El Conceyu del Texu va regalá-yos a les autoridaes asturianes un llibru sobre esti árbol

El Presidente asturianu,los portavoces de los grupos parlamentarios na Xunta Xeneral, el futuru conseyeru de Mediu Ambiente y el Fiscal de Mediu Ambiente son dellos de los personaxes que van recibir, como regalu, un llibru sobre'l texu col que quieren concienciar a les autoridaes sobre la importancia d'esta especie del país atacada por bien de males y pa la que piden protección, que diz que nun tien, ello con ser oficialmente especie protexida.

El llibru que van regalar dende'l Conceyu del Texu ye obra de Simón Cortés, Fernando Vasco y Emilio Blanco, y supón una recopilación y actualización de los conocimientos sobre esti árbol, míticu. El colectivu "Conceyu del Texu" denuncia que l'abandonu que sufren los texos ye grande y que llega a situaciones como la del Sueve, onde se denuncia qu'existe una superpoblación d'herbívoros, erosión y falta de renuevu d'árboles. Casu más grave ye'l de dellos texos simbólicos asitiaos xunta ilesies o llugares especiales que sufren constantemente l'ataque de les obres que se faen na so contornada y que lleguen a secalos, como asocedió en Texos d'Allande o Uviéu. Según el Conceyu existen n'Asturies cerca de 8.000 texos, lo que supón ún de los parques d'esta especie más importantes d'Europa.