El Conceyu de Xixón convoca la primer edición del Premiu Fierro Botas a la Meyor Idea Normalizadora

Tres decidir el desaniciu del Premiu d’Ensayu y Trabayos d’Investigación Fierro Botas, el Conceyu de Xixón ta acabante de convocar el concursu nuevu col que pretender siguir faciendo alcordanza del xesuita. Trátase del Premiu Fierro Botas a la Meyor Idea Normalizadora pa escolinos de Secundaria y Bachilleratu.

La baxa participación nel Fierro Botas pa estudios d’investigación en llingua asturiana o gallego-asturiano sobre la cultura rusa o eslava, la memoria social y coleutiva de los pueblos rusu y asturianu, o la memoria social y coleutiva de Xixón, que vivió l’añu pasáu la so novena edición, llevó a la Conceyalía d’Educación y Cultura a dar el pasu de finar cola so convocatoria. Sicasí, consideróse importante siguir recordando Federico González-Fierro Botas, espertu en llingua asturiana que finó n’accidente de tráficu en Rusia nel 2002 y que destacó nel so llabor cola mocedá asturiano, y da-y el so nome a una de les iniciatives de la Oficina de Normalización Llingüística pa esti cursu.

Asina naz el Premiu Fierro Botas a la Meyor Idea Normalizadora, empobináu al alumnáu de Llingua Asturiana de Secundaria y Bachilleratu de Xixón col envís de favorecer el so protagonismu y la so reflexón y implicación nel procesu de normalización llingüística. Según dicten les bases, va premiase’l diseñu d’una campaña normalizadora que desenvuelva una iniciativa orixinal pa favorecer l’usu y la visibilidá del idioma nel conceyu.

El plazu de presentación d’idees entama’l próximu 4 d’avientu y remata’l 30 d’abril, teniendo que ser tolos proyeutos factibles de desendolcase na realidá. Los ganadores van poder ver la so idea fecha realidá y, amás, van recibir una pizarra dixital pal so aula.