El Conceyu de Xixón píde-y a RTVE que nun pieslle la emisora de Radio 5

Los programes de mengua de plantiya y recortes nos centros emisores del Ente Públicu RTVE van afectar sobremanera a les emisores locales de radio del organismu públicu de comunicación. La emisora de Xixón de Radio 5, dedicada n'esclusiva a la información podría ser una de les afectaes, motivu pol que la Xunta de Gobiernu de Xixón unvió güei una carta a la presidenta de RTVE Carmen Caffarell na que-y pide que siga abierta la emisora xixonesa de RNE-5

Esta emisora, qu'echó a andar nel añu 1987, ellabora 14 boletines informativos locales que se pasen ente les 8.25 y les 21.25 hores, dándo-y trabayu a una plantiya de 11 persones qu'aporten, según se sorraya dende Xixón "un gran volume de noticies a los informativos de RNE-Asturies" faciéndose cargu amás de los acontecimientos de Xixón que tienen güecu na programación pa tol Estáu de RNE-5. El Conceyu de Xixón camienta que RNE-5 "cumple d'una misión de serviciu públicu a la ciudá y a Asturies" y que'l so pieslle diba ser "un güelpe al oxetivu de los medios de comunicación públicos y un agraviu comparativu a la mayor ciudá d'Asturies".