El Conceyu de Xixón lleva a trámite’l so espediente toponímicu

Dempués de meses d'intensu trabayu por parte del equipu d'especialistes y collaboradores de la Xunta de Toponimia d'Asturies, el conceyu de Xixón yá tien fechu'l so espediente toponímicu, que va pasar esti vienres pel plenu del Conceyu.

El de Xixón ye ún de los espedientes más pormenorizaos de toa Asturies, inxertándose nelli 26 informes parciales coles venti parroquies rurales del conceyu y otros 6 colos topónimos de les seis estayes en que s'estrema la parte urbana del conceyu, el de mayor población de toa Asturies. Cada informe llega a niveles mui concretos, inxertándose nelli'l nome de los llugares y núcleos de población y tamién, por voluntá del mesmu conceyu, otros topónimos menores que nun suelen conseñase n'otros trabayos de la Xunta de Toponimia.


Ente los nomes de les parroquies, camúdase Jove por Xove, Bernueces por Castiello de Bernueces, Cenero por L'Abadía Cenero, recoyendo la forma "L'Abadía" cola que muncha xente de la parroquia -la mayor del conceyu- se refier a la mesma, y Huerces por Samartín de Güerces, mientres que Lavandera va ser Llavandera, Leorio, Llorio y Poago, Puao, mientres que na parroquia de Baldornón camúdase la "B" por una "V" mas fiel al aniciu etimolóxicu del topónimu. En dellos casos el conceyu quixo caltener dobles denominaciones, siendo esti'l casu de Ceares / Ciares y, yá dientro de lo que ye la ciudá de Xixón, el del barriu de "Nuevu Xixón" neotopónimu de los años 70 que va caltenese al llau de la denominación tradicional del llugar, que ye "Perchera".