El Conceyu de Xixón convoca'l VI Premiu d'Ensayu y Trabayos d'Investigación Fierro Botas

Nel so enfotu de facer alcordanza de Federico Fierro Botas, el Conceyu de Xixón ta acabante de convocar la sesta edición del premiu d’ensayu y trabayos d’investigación que lleva’l so nome. El plazu d’entrega de trabayos fina’l 13 de setiembre.

El comprometíu sacerdote xesuita, un namoráu de la cultura asturiana y rusa, perdió la vida nel añu 2002 nun accidente de tráficu en Rusia a los 59 años, dexando atrás un trabayu bayurosu de traducción de testos relixosos a la llingua asturiana. Pol so gran llabor, el Conceyu de Xixón decidió entamar esti premiu col que recordar la so memoria y, al mesmu tiempu, apoyar el trabayu de los investigadores asturianos.

Valoráu con un primer premiu de 3.000 euros –1.000 euros menor que na edición pasada– y la espublización del trabayu, esti concursu empobínase a aquelles obres d’ensayu o trabayos d’investigación en llingua asturiana nos que se recueyan los siguientes ámbitos: investigación sobre la cultura asturiana; sobre la cultura rusa o eslava; la memoria social y coleutiva de los pueblos rusu y asturianu; y la memoria social y coleutiva de Xixón. Éstos nun han de tener menos de 50 fueyes DIN-A4 con 2.500 carauteres máximo per páxina, y el testu ha de respetar les normes de l’Academia de la Llingua Asturiana. Los trabayos presentaránse enantes del 13 de setiembre per triplicao nun sobre qu’incluya una plica en cualquier de los rexistros municipales de la ciudá y nel que tea indicao ‘Premiu d’Ensayu y Trabayos d’Investigación Fierro Botas. Conceyalía d’Educación, Cultura, Xuventú y Fiestes’.

El ganador de la edición anterior d’esti gallardón foi Inaciu Hevia Llavona gracies a un estudiu perintersante sobre la historia de la botella de sidra de Xixón que llevaba’l nome ‘La botella de Xixón. Oríxenes y desendolcu hestóricu de la botella de sidra d’Asturies’. El xuráu del premiu destacó “lo novedoso del tema, rescamplando sobre manera la conxugación que l’autor fai ente’l patrimoniu cultural y etnográficu, la cultura popular y la industria; asina como l’apueste que fai por dar al mundu una mayor conocencia de Xixón y d’Asturies”. Asturies.com entrevistó al investigador xixonés tres dase a conocer el so trabayu.