El conceyu de Samartín del Rei Aurelio debate esti xueves una moción que pide la oficialidá na reforma del estatutu

Sectores cívicos del conceyu de Samartín del Rei Aureliu van llevar al plenu que va celebrase esti xueves, 29 de marzu, una moción na que se-y pide al Ayuntamientu que-y solicite a la Xunta Xeneral del Principáu el reconocimientu dafechu de los derechos llingüísticos de los falantes d'asturianu na próxima reforma estatutaria. La propuesta, que van llevar a plenu los conceyales d'IX-Bloque, cuenta col sofitu de 500 firmes de vecinos del conceyu y tres de la so ellaboración tán delles asociaciones culturales entreguines, casu de la tertulia lliteraria Reciella Mallory.

Asturies.com faló col escritor Chechu García, que ye ún de los promotores d'esta iniciativa popular a favor de la oficialidá. L'autor esplicó que la presentación d'esta moción col aval de más de 500 firmes "que se recoyeron rapidamente, porque entovía podríemos consiguir munches más" demuestra que "los que tamos a favor del asturianu somos una corriente social, y non solo los que vamos a les manifestaciones". Según Chechu García, el sofitu popular a la moción ta faciendo que los políticos la tean estudiando seriamente. Asina, tres de los contactos que tuvieron a lo llargo de les últimes selmanes con representantes de PP y PSOE, los promotores de la iniciativa creen que se pue ser "optimista" énte'l plenu del xueves sobre la posible aptobación del documentu.

El camín que marcaron conceyos como Villaviciosa o L.lena, gobernaos respectivamente pol PP y pol PSOE, y que yá cuenten con declaraciones institucionales qu'insten a la Xunta Xeneral del Principáu d'Asturies a otorgar el status d'oficialidá a la llingua asturiana, allumen el camín de la propuesta de Samartín del Rei Aurelio, que contempla en tou momentu la "voluntariedá del individu a la hora d'exercer los derechos llingüísticos amparándose nes diverses lleis, constituciones, declaraciones y cartes de derechos yá existentes" y que califica de "discriminación" el fechu de que "n'otres partes del Estáu se contemple'l derechu a usar en tolos ámbitos la llingua patrimonial y n'Asturies, non".