El Conceyu de Nava entama unes xornaes sobre música tradicional

Del vienres al domingu, Nava va celebrar les I Xornaes de Música Tradicional. Actuaciones, exhibiciones, un concursu y un alderique van ser dalgunes de les actividaes que va acoyer la villa, ente les que destaca un conciertu de N’Arba.

La Conceyalía de Cultura del Conceyu de Nava entama estes xornaes, con un programa más que completu, cola collaboración de la Banda de Gaites LaKadarma, l’Asociación d’Hosteleros de Nava ‘HostelNava’, la Escuela Municipal de Música y la Casa de Cultura Marta Portal. La inauguración d’esti eventu va tener llugar mañana, a les 18 hores, nel Muséu de la Sidra, llugar que va acoyer darréu una mesa redonda baxo’l títulu ‘La gaita nel conservatoriu’, nel que van participar Ana González, conseyera d’Educación, Cultura y Deporte; Alberto Veintimilla, direutor del Conservatoriu Superior de Música del Principáu d’Asturies; David Bellas, profesor de gaita del Conservatorio Profesional de Música de Viveiro y de la Escola Municipal de Música de Foz; Juan Luna, profesor de gaita, percusión y requinta de la Escola de Música Tradicional Galega A Píntenga Marela, asitiada en Madrid; Flavio Rodríguez Benito, profesor de gaita del Conservatoriu Profesional de Música de Xixón; y Ricardo Soberado, profesor de gaita de la Escuela de Música Tradicional Manolo Quirós, ex profesor de conservatoriu y direutor de la Banda Gaites Xácara. Van zarrar la primer xornada, a les 22.30 hores, los conciertos de Elías García y Mapi Quintana, que van dar un repás al repertoriu tradicional del Conciyu de Ḷḷena, y de los llocales Vrienden, na plaza Manuel Uría.

Yá de sábadu, nel Llagar de Sorribes, va principiar, a les 10 hores, el I Alcuentru de Luthiers d’Instrumentos Tradicionales ‘Villa de la Sidra’, nel que van participar Ánxel Vega, con percusión tradicional asturiana (Vezos y Costumes, de Xixón); Chus Solís, con gaita asturiana (Etimta S.L., de La Felguera); David López, con gaita asturiana, gaita gallega y whistle (Sopeña de Cabuérniga, Cantabria); Xaime Rivas, con una muestra de gaites rabiles antigües (Escola Municipal de Artes e Oficios de Vigo); y José María López, con acordión (Musical Dunboa, d’Irun). Tamién va haber una muestra didáutica de la Escola de Música Tradicional Galega A Píntenga Marela (Madrid); una exhibición de caxones y vestíos de gaita, por Ixuxú; y otra de percusión tradicional gallega, por Foliqueiras (Vigo). Esta actividá va allargase hasta les 21 hores, mientres que’l domingu va celebrase de 10 a 15 hores.

Los Yerbatos y l’Agrupación Folclórica La Flor del Pumar, pela so parte, van ufrir una amuesa de baille asturianu, de 12 a 14 hores, nes places Dominganes y de Manuel Uría, mientres que, a les 11, la Casa de Cultura Marta Portal va acoyer la presentación del llibru ‘O gaiteiro técnico Vol. I’, de Luna. Darréu, Glenn Brown, profesor de gaita nel National Piping Centre de Glasgow, va ufrir una clase maxistral de gaita escocesa. Yá de tarde, a les 18 hores, va tener llugar un pasucais pa, depués, na plaza Manuel Uría, celebrar el I Festival de Bandes de Gaitaes LaKadarma. Nél van tomar parte la Bandina Tradicional de la Escuela Municipal de Música de Nava, la Banda Gaites Ribeseya, el Grupu didácticu A Píntenga Marela, la Banda Gaites Llariegu y la Banda de Gaites LaKadarma. Na mesma plaza naveta, a les 22.30 hores, van actuar Brown, Bellas, Tuenda y N’Arba.

Concursu novedosu n’Asturies

Pal día caberu de les I Xornaes de Música Tradicional, LaKadarma trai a Asturies un concursu de formatu novedosu nel país que tien munchu ésitu n’otros puntos del Arcu Atlánticu. Trátase d’una competición nel que los participantes tienen dalgo menos de cinco minutos pa ganar la simpatía del públicu, encargáu de decidir el ganador. Asina, con una gaita o una percusión, acompañáu d’hasta cuatro compañeros o en solitariu, el concursante tien vía llibre pa entamar una performance. La banda gaites llocal toma como referencia pa entamar esta iniciativa, de nome 'LaKadarmada', concursos como’l Kitchen Music, del Festival Interceltique de Lorient; o’l Drumming for Drinks del Piping Live Festival de Glasgow. La hora prevista d’aniciu d’esta actividá ye les 13 hores na plaza Manuel Uría. Una hora enantes, va actuar el Grupu didácticu A Píntenga Marela.