El Conceyu de Llangréu entama dos cursos d’asturianu

Trátase d’un cursu d’ainiciu a la llingua asturiana y otru d’afondamientu, de 30 hores cada ún, destinaos a tol mundu y de baldre. Éstos van principiar el llunes 28 de febreru y la inscripción pue facese hasta esi mesmu día.
 
El Conceyu de Llangréu pon en marcha estos cursos en collaboración cola Conseyería de Cultura y Turismu col oxetivu d’averar el conocimientu de la llingua del país a tolos llangreanos. La Casa la Cultura de Sama ye’l centru onde van impartise les clases los llunes, martes y xueves n’horariu de 19 a 21 hores. Toles persones que completen el cursu van recibir un certificáu acreditativu.
 
El plazu de matrícula pa los cursos yá ta abiertu y va zarrase cuando principie la primer clase. La xente interesao nellos pue matriculase per delles víes, indicando siempre los datos personales: nome, NIF, señes y númberu de teléfonu. Asina, pue usase el corréu convencional enviando una carta al Centru de Referencia de la Cultura y la Llingua Asturiana ‘Casa de los Alberti’ (cai San Fernando, 33900, Ciañu); el teléfonu 984.282.925; el Fax 985.698.629; o’l corréu lectrónicu llingua@ayto-langreo.es.