El Conceyu de Colunga abre la inscripción pal XIII Certame de Gaita Asturiana ‘Premiu Gaiteru Lliberdón’

El 13 de xunetu, a les 19 hores, va tener llugar na colunguesa Sala Loreto’l XIII Certame de Gaita Asturiana ‘Premiu Gaiteru Lliberdón’. Les persones interesaes en participar tienen hasta’l 20 de xunu pa formalizar la so inscripción.

Esti tornéu clásicu pa gaiteros divídese en dos categoríes: infantil, hasta los 15 años, y mozu y adultu, de 16 años p’alantre. Habrá un cupu máximu de 12 participantes en caúna d’elles, quedando abierta una llista de reserva pa cubrir baxes posibles. El concursu consistirá na interpretación de dos pieces llibres cola gaita tradicional asturiana, anunciando de manera previa’l so títulu y autor, cola posibilidá de que sían composiciones propies. L’actuación nun va poder superar los diez minutos y ye obligatoriu l’usu del traxe tradicional del país.

La inscripción pal concursu ha de facese de manera presencial na Casa Municipal de Cultura, na direición de corréu electrónicu  cultura@colunga.es o vía postal a la direición siguiente: Avenía de la Reconquista, 23; 33320 Colunga, indicando ‘Certame de gaita’. El mensaxe o’l sobre ha d’incluyir el nome y los dos apellíos, edá, fecha de nacencia, domiciliu, llocalidá, conceyu, teléfonu de contautu y corréu electrónicu nel casu de disponer d’él. El premiu en categoría infantil va ser de 100 euros, mientres que’l segundu y el tercer clasificaos van llevar 70 y 40 euros, de manera respeutiva. El meyor adultu, pela so parte, va algamar una recompensa de 280 euros, siendo de 180 pal segundu y de 80, pal terceru. Toos ellos van recibir tamién un troféu. Nel casu de necesitar más información, la organización va atender nel teléfonu 661.604.627 o al traviés del corréu cultura@colunga.es.