El Conceyu de Bimenes convoca’l “Concursu de Cuentos pola Oficialidá”

El Conceyu de Bimenes presentó les bases del "Concursu de Cuentos pola Oficialidá" que llega con esta a la IX edición. Con 800 euros pal ganador, 500 pal segundu clasificáu y 350 pal terceru, el concursu de Bimenes tien abiertu'l plazu de presentación d'orixinales hasta'l 1 de xunu.

Les bases apauten que los cuentos, de tema llibre y inéditos, han redactase en Llingua Asturiana y tener una estensión máxima de 10 fueyes mecanografiaes a doble espaciu per una sola cara, unviándose orixinal, trés copies y otra copia más en soporte informáticu. Orixinal y copia han firmase con alcuñu y mandase los datos personales en sobre aparte, yendo too ello a les señes de la Casa la Cultura de Bimenes, asitiada en Santuyano ensin númberu y col Códigu Postal 33527. Pa cualquier aclaración ta disponible'l teléfonu 985 70 48 16

Les obres premiaes van pasar a ser propiedá del Conceyu, y la llista de premiaos va dase a conocer nel actu institucional d'entrega de premios, que va ser el día 30 de xunu, coincidiendo coles celebraciones de la Fiesta de la Oficialidá de la Llingua Asturiana en Martimporra, capital de Bimenes, onde va facese una llectura pública del rellatu ganador del primer premiu na voz del so autor o autora.